孖妹Ｓ檔案：後大時代搲客 經紀行大鬥法

致富：百萬Upgrade落盤系統

郭：致富證券投資銷售部董事　郭家安

Kitty：大市成交縮到得番700億元，好灰啊！

郭家安	陳啟峰	張智威

郭：唔使咁悲觀，目前成交已經好過舊年，加上八月例靜，所以依家市況唔算太淡。我哋發展計劃長遠，冇因市況而改變步伐，致富全港有20間分行，已做到「梗有一間係左近」，暫時冇計劃再加。不過仲不斷請緊人，近幾個月嚟，分行每月平均會增加4至6人，其實計埋其他部門，今年都請咗30人左右，增聘步伐穩定。

獎金旅行激勵士氣

公司今年計劃投放過百萬元Upgrade落盤系統，今個月下旬仲會推出三項全新交易功能。市況靜咗，客戶傾向炒波幅，所以會推出區間交易功能；為迎合內地客喜歡用盡資金買股嘅取態，會喺舊有嘅All-in功能，再添上以二分一、三分一，如此類推嘅全購功能；另亦提升至24小時接受提存指示。

Kitty：員工係公司最珍貴嘅資產，公司最近有乜特別表示先？

郭：雖然成交係縮咗，但受惠iBond認購同新分行開幕，公司七月開戶人數反而創出近年新高，有部分分行排隊等開戶要等足3個鐘，單日開戶數目可以多過四月時一倍，近月開張嘅葵芳分行已經達到全年開戶目標喇！

近期新客以年輕人為主，多數係想用iBond做投資起步，慢慢熟悉證券市場運作，為日後投資打好基礎。同時，仲留意到有舊客戶回流情況，灣仔分行最受惠，六月份佣金收入仲好過四月。

為提振員工士氣，公司喺四至六月都有發放激勵獎金，估計七月份都會有，而且喺四月同六月都有舉行公司旅行，分別請同事去台灣同柬埔寨，七月仲搞咗一次致富文化分享會，管理層都有出席茶敍，令員工可以了解公司歷史。

耀才：掃旺區靚舖拓戰線

陳：耀才證券（01428）行政總裁　陳啟峰

彩兒：內地以股市上升創造「財富效應」，從而推動經濟的決心似乎好堅定。

陳：A股進入調整期係意料之內，目前處於優化交易制度過程，顧及中央金融改革穩步向前，資本市場向外開放，加上人民幣國際化，未有因素會再推倒股市，預計牛市會延續2至3年。公司對本港金融業有信心，所以會繼續招兵買馬，亦希望今年內增設4至5間新分行，其實一路都想搵好舖位，未有網點嘅地區都有機會開店，其中港島南區及西區，沙田區與將軍澳區就最有興趣，目前公司有一半分行係自置物業，未來嘅新舖都會價合即買。

內地搞講座增宣傳

雖然耀才七月新開戶數目回復至舊常態，但未見蕭條情況，近期較多銀行客轉過嚟，主要係希望低吸股份，新客以20至30歲後生仔為主。為保持交易系統質素，公司會喺今個星期舉行嘅招聘會繼續增聘程式員等IT專家，同時都想請交易員、會計及交收部員工，整體目標請50人，預計每年薪金支出將增加約1,000萬元。

彩兒：耀才積極吸納內地客，最近有乜吸客秘技？

陳：目前內地客戶佔公司整體客戶5%，公司會不定期與輪商合作，喺內地搞投資講座，而且試過訂製有「耀才證券」字樣嘅LED便攜風扇同地圖喺內地街頭派發，依家正與廣東省嘅大學進行磋商，計劃舉辦大學生講座，亦希望請內地大學生到公司做實習。最緊要都係以最少資源，達到高效宣傳效益，所以會喺公司旗下財經台播放普通話節目吸客。

信誠：彈性拆佣吸引經紀

張：信誠證券聯席董事　張智威

彩兒：信誠三月到依家吸咗過萬新客，淨係靠iBond都已經吸咗4,000人，你實發夢都識笑醒啦！

張：呢批客大部分係現金客，年齡層走向兩極，以20幾歲後生仔同50、60歲年長者為主，事關年輕人鍾意Friend搭Friend介紹朋友開戶，亦鍾意拉大隊一齊做申請，而且佢哋亦會介紹埋父母開戶。吸客特色係事件性主導，例如iBond認購、「熱爆」新股IPO，如萬景（02193）及HTSC華泰證券（06886）。

公司奉行經紀制，大多數新客戶係經紀搵番嚟，為咗鼓勵佢哋吸客，擁較多客戶者喺同公司對拆佣金方面係有得傾，經紀出去幫客開戶，公司會搵人幫佢手落盤，亦可派員陪同見客開戶，未來會落力Push經紀吸客。

彩兒：交投淡靜咗，公司投資會唔會縮沙？

張：公司今年喺落盤、市場推廣、後勤同經紀部門都Keep住請人，就算六、七月市況回落都仲有請。由於公司對後市有信心，與其旺市先爭人，不如目前提早做好準備迎戰，未來都會再因應市況加人，不過分行覆蓋率已足，未有開新店計劃。仲有啊，公司已計劃在短期內發花紅，加強員工歸屬感。

籌劃深港通孖展Plan

公司喺滬港通推出前已Upgrade落盤系統，不過因應未來即將推出嘅深港通，會定期再Upgrade，我哋留意到深圳投資者鍾情短炒，計劃喺深港通藍圖一出，就會設計「低按息、高按倉成數」嘅孖展計劃吸客。

凱基：業務多元 瞄準亞洲

鄺：凱基證券執行董事兼研究部主管　鄺民彬

Kitty：凱基香港近排公布上市計劃，主攻東南亞業務，有乜宏圖大計？

鄺：金融市場個餅一路擴大，需要上市集資，增大胃口，先有能力迎接商機，同時公司亦希望在亞洲區作地區性發展，打「亞洲盃」，短期市況波動並唔影響發展計劃。

有機會收購港券商

凱基香港係整合式金融服務公司，目前有七大業務範疇，當中包括傳統經紀、投行、財富管理、固定收入等業務，公司未來傾向透過收購、擴大業務資產、客戶基礎及提高業務多元度，從而提升服務質素，目前已經喺新加坡及泰國「插旗」，未來希望透過當地智慧，尋找鄰近地區可達協同效應嘅企業，相信具客基嘅證券公司會係收購嘅頭號目標，唔排除收購本港券商。

凱基目前客戶類型有八至九成係散戶，未來都想吸納更多高端客，做到兩條腿走路；客源方面則有兩成係內地客、七成係本地客，為力爭吸納內地客戶，正計劃喺靠近邊境嘅東鐵沿線開設一至兩間新分行，亦會喺連接內地嘅關口賣廣告，提升知名度。

Kitty　彩兒

若有料報畀彩兒同Kitty或有嘢問，可電郵money.biz@on.cc