絲絲講場 :和電陳婉真至冧日本舊歌
講開和記電訊香港（00215）推出嘅音樂App，一講到聽歌，佢哋營運總裁陳婉真（Jennifer）自爆讀書嗰陣好鍾意聽日文歌，仲係中島美雪嘅超級Fans添。
嗱，聽清楚睇清楚，係中島美「雪」，唔係做《NANA》嗰位中島美「嘉」。Jennifer講緊嗰位中島美雪，係日本八十年代國寶級創作歌手，佢唱歌填詞作曲都一樣咁叻，佢有啲歌仲納入咗日本中學教科書做教材。
後生時潮用卡式帶
佢啲歌？王菲嘅「容易受傷的女人」、鄧麗君嘅「漫步人生路」、林子祥嘅「莫再悲」都係，總有隻聽過啩。
Jennifer仲話，以前係聽中島美雪嘅「卡式帶」，最近先買番佢嘅CD。咩係「卡式帶」？係未有CD、MD同MP3前，可錄歌聽歌嘅潮物。硬要絲絲形容嘅話，惟有講句係呢樣嘢上面有兩個捲軸，係唔少人嘅集體回憶咁啦。絲絲有冇聽卡式帶？絲絲聽開黑膠嘅喎。
余絲韻