落雨時買、好天時買、開心時買、唔開心時更要買嘅，除咗鞋，仲有包包。無辦法，女人睇女人，第一眼實掃個包包，掃完先講。咁多牌子，邊個先係女士心目中嘅「賣飛佛」？J.P. Morgan最近做咗個調查，話係Coach。但鍾意還鍾意，調查入面唔少女士都話唔想畀錢將Coach包包私有化。何解？
呢個調查訪問咗500位年齡介乎22歲到55歲，而又舊年買過包包嘅女士。當中最多人鍾意Coach（21%），之後就到Michael Kors（12%）同Kate Spade（10%）。
不過，肯畀2,000到4,000蚊買袋嘅人當中，超過七成人覺得Coach賣得貴咗。抵唔抵，呢啲嘢真係非常個人。冇你拎開嗰隻牌子？事關呢度講緊唔係你嗰隻級數嘛。絲絲鍾意乜包包？絲絲自己都好想知。
余絲韻