絲絲講場：李慧敏認長者唔憂接班

「唔係我哋一班長者嘅功勞」，Rose尋日話恒生今日有咁嘅成績，係大家上下一心嘅成果，所以對接班絕對有信心。

回鄉證隨身 北上偷閒

「一姐」竟然自認長者？絲絲覺得，就算係，佢都絕對係非一般嘅長者，仲係好着重生活品味嗰隻。事關Rose早前先用3.75億天價，買咗以螺旋形設計聞名嘅OPUS單位。佢仲愛品茗，得閒就北上搜羅靚茶葉同茶壺，所以佢幾時都要有張回鄉證帶喺身咁話。

話時話，Rose仲邊度有咁多時間品茶？佢嘅恒生執董三年任期，雖然今年五月已經屆滿，但佢似乎未打算退下火線，講吓講吓似乎仲有唔少發展大計。好似尋日，佢就不時提到，唔派特別息係為咗「長遠」發展，仲話「我哋家教唔係有錢就要飄飄然」。

Rose今年62歲，睇睇佢嘅CV，就知道「一姐」即是「一姐」，幾時都咁搏。佢七七年已經加入滙豐旗下獲多利企業金融部，喺集團服務足足三十四年，素有「中國通」之稱。○八年再升任滙豐環球銀行業務中國及香港主管，雖然之後處於半退休狀態，改任滙豐中港區顧問，但後來「復出」接棒，以退休之齡空降恒生做「一姐」。

所以話，買到OPUS，都唔係冇原因。

余絲韻