Market Insight：電力股短線有睇頭

上周美國聯儲局議息，延續市場對今年「至少」加一次的預期，隨後的第二季GDP差強人意，僅升2.3%差過市場預期，上周五公布的第二季勞動力僱傭成本，更創下33年來最少升幅，再次印證美國就業市場復甦有量無質。美國海嘯後復甦，係就係比歐日理想，但只算阿駝行路，加息期提前殺到埋身機會固然低，未來加息幅度，睇嚟也相當之有限。

上周五，港股高開後一度倒跌，收市前數分鐘，長和（00001）及中移（00941）有買盤掃高，即使唔算好誇張，但靜市之中，經已足夠郁到個市，恒指埋單升138點收報24,636點，反觀國指依然弱過藥煲，跌5點收11,131點。

亂托市製造蝦碌

中證監誓神劈願話短期無退市打算，但托市方式與手法，卻係日日新鮮。好聽啲講就使股民目不暇給，實際人為的市況，根本無路可捉。

好似滬綜指最大權重股中國石油（601857.SH），喺中央托市之初，為挾走股指期貨淡友，國家隊唔計價狂掃，曾經將中石油掃到兩星期內狂升45%。不過，大家始終唔係幕後操盤人肚裏條蟲，掃到中石油year high，長遠並唔係辦法。

隨住未平倉合約減少，「惡意」股指淡友撤退得七七八八，上周中石油的無形之手突然玩失蹤，過去一星期，股價累跌一成九之多，難怪惹來阿爺退場的揣測。怯於重磅股轉弱，滬綜指上周彈到接近10日及20日線技術阻力，又再腳仔軟，一周勁跌一成。

A股托市規矩成日變，魚缸大媽固然個個做晒丈八金剛，而對隔山買牛的外資芬佬，更有不明朗揸錢的傳統。即使有調查顯示中港股市基金手頭現金量已經相當高，但索性減磅翹埋對手食花生者，依然不少，形成了成交萎縮，H股無新錢入不特止，仲變埋中港基金的提款機，往往一彈又散，久而久之，基金大戶博吓反彈興趣就更加細。

硬着陸風險加大

上周六內地公布七月製造業PMI比預期差，跌到50的盛衰分界線上。展望下半年，股災過後經濟下行壓力更大。從近日股市表現可見，中央提出的「一帶一路」、「互聯網+」救經濟的構思，都抵不住經濟硬着陸風險加大的悲觀想法。

儘管上周五港股夜期高收，報24,658點較日市升132點，亦較現貨高水22點。然而，夜期周五收市一刻，正值美股企喺全日高位附近，而且未知內地製造業PMI差強人意，睇怕今日早市，市況都係凶多吉少。

按照趨勢，下半年人行繼續放水的在所難免，中國息率有進一步下調的需要及可能性。近日所見，最多中港基金捧場的，都是一些內房股高息債券，中國經濟展望差勁，資金疊埋心水搵定息投資充撐吓投資回報。不過，二三線城市「吉樓」庫存量高，消化得好慢乃係不爭事實。有關內房債違約風險的問題，恕古勝做唔到精闢的推介，小小哋玩下無妨，但實在不宜賭身家。

息率回報夠穩定

其實，要搵中資股高息回報，電力股算得上吸引，一來在製造業疲弱，影響需求，煤炭價格維持低企中線既成定局，即使電力需求減弱，電企營收維持較高盈利基數可能性十分大。此外，市場也開始預期第三、四季，內地上網電價會有一至兩次的下調，除非幅度遠高於預期，否則估值是頗吸引。

像華能國際（00902）及大唐發電（00991）兩隻老牌國家電企，一五年的預計周息率分別有6.1厘及5.6厘。至於在下心水，有今年受惠於水電增幅比預期強的華電國際（01071），息率有4.3厘，另華潤系的華潤電力（00836）預計息率亦有4.6厘，對比國家電網年初發七年歐元債，利率僅稍高於1.5厘，在資金揀無可揀下，電力股中短線有跑贏大市條件。

古勝