阿爺早排下旨，要中資企業「起來」，把血肉築成「撐市」嘅長城。一間間上市公司高管要自掏荷包嚟增持公司股份，一個個搞掂，就梗要出嚟舉手話「完成任務」。
最近呢兩日，輪到中興通訊（00763）出通告，話11名管理層拎咗170萬元人仔出嚟增持股份。如果平均攤分計，每人大嗱嗱出咗15萬人仔，等於部分接旨管理層成三個月嘅人工！
絲絲睇番舊年年報，見有兩位管理層舊年年薪介乎63至72萬，即是平均月薪5萬幾人仔，計番條數，今次阿爺一個Order，就拎咗三個月人工出嚟買股，仲要半年內冇得減持。冇冇冇，邊有貼錢打工啫，呢啲投資嚟嘅嘛。
余絲韻