絲絲講場：A股沽神變牛王 唱8000點
A股「沽神」Jon Carnes多年來一直唱淡中國概念股，四年前仲因為唱衰一間內地企業，而要急急走佬離開片中國大地。呢位地球上最無可能會睇好內地股市嘅仁兄，尋日忽然轉死性唱好A股，話滬綜指嚟緊18個月有機衝上8,000點！滬綜指尋日先得嗰3,705點，連4,000點都係得個望字。而佢，佢真係話8,000點。
內地人大把錢買股
佢睇好嘅理由，就係內地國民家庭財富有成21萬億美元，但只得唔夠10%人投資股票，簡單一句就係內地大把錢，啲錢仲要搵地方去，所以A股牛硬。佢仲話，好多人錯過咗六月時A股瘋牛，呢回跌得咁深，正正係入貨好時機添。
當年搞到8公司退市
之後點，絲絲唔敢估。不過呢位41歲沽神過往戰績，確實唔簡單。佢九二年用3,000美元起家，開始佢嘅投資生涯，研究咗內地股市至少十年，專瞄準啲帳目有發水成分嘅公司，簡單嚟講，即是邊唱邊沽空。
有分析員甚至封佢做史上至優秀嘅沽空者，話佢勁過沽空機構渾水創辦人Carson Block同著名基金經理艾因霍恩。點勁法？就係搞到至少八間中國公司要退市。
咁搞法，佢都知要小心，所以佢以往一直用網名「Alfred Little」嚟發表唱淡報告，但結果喺一一年都一樣出事，要急急走佬離開中國，佢位中國土生嘅拍檔就因為被指誹謗而要坐兩年監添。
佢位拍檔早已重出江湖，家陣喺加拿大同Carnes拍住上管理基金，不過內地網民話佢哋隻基金規模得1,000萬美元，只係小蝦米。
見識完阿爺威力救市，今次又輪到「沽神」變大好友，異象一個接一個，地球好危險，絲絲好想返火星。
余絲韻