絲絲講場：中金申上市搞喊baby

中金（CICC）上市唔單止萬眾矚目，連中金人都興奮落淚！日前CICC遞咗嚟港上市嘅申請。呢一遞，即刻搞喊好多內地金融人，佢哋好多都係CICC baby，即係當年一畢業就入中金，呢班出自中金嘅第一代內地投行人，睇住阿娘捱咗廿年終於上市，好難唔感觸同埋落淚。

點解阿娘上市令到中金人咁感動？咪就一個「情」字咁簡單囉！呢幾日網上有篇文章講到，中金由上而下都充滿人情味，令員工對公司有歸宿感。

有個由畢業就加入中金工作嘅CICC baby，睇到母公司嘅上市文件，諗番過去十年點滴，啲眼淚即刻湧出嚟，佢將呢段感受打咗上網，即刻獲得幾百個中金人讚好同埋評論。唔單止一般員工，連中金董事長丁學東出席一個國際論壇都係掛中金嘅PASS，可想而知，丁總都以身為中金人而自豪。

而CICC每年嘅新春晚會，都受到員工高度重視！女員工會遠赴巴黎買衫裝身；有交易團隊更加會提早一個月搵嚟中國最好嘅老師培訓高難度舞蹈……就連管理層去海外出差，都會召集喺當地嘅舊下屬一齊食個飯、吹下水。

中金嚟港上市後，相信會有更多中金人嚟港做嘢，除咗人工有分別外，兩地嘅稅制都好唔同，唔知班中金人今次會唔會好和平咁爭相嚟港呢？

余絲韻