Market Insight：水泥股有望轉勢

聯儲局一連兩日議息，看官今晨相信已經知道結果。主席耶倫想繼續拖得就拖，抑或滿足吓債商預期，喺九至十二月期間先加一次試水溫都好，過去一年，因為退市及加息預期，美元輾轉成為全球最強貨幣，美匯指數累積升幅兩成，對跨國美企的海外收入影響，經已喺第二季度業績或多或少見到。

隔晚美國公布的七月消費者信心指數，從六月份的99.8急插至90.9，是去年九月以來新低外，跌幅更是一一年八月以來最大。市民對息口回升，就業市場改善的樂觀程度開始減退，經濟復甦信心似有動搖迹象，如果聯儲局企硬經濟數據為本，以制訂息口正常化速度，睇落未來一年就算加到息，幅度亦都相當有限。

彩票銷售反映經濟

北大人澄清短期不單只無退市打算，仲計劃緊睇位加注。在不少大玩家准買唔准沽底下，昨日滬綜指愈升愈有，收升3.4%報3,789點。一班老友茶餘飯後話題，離唔開今次暴力托市點收科，證金公司為首的國家隊掃入過萬億元人仔官股，就算籌組指數基金放番出去，市場都唔易消化，更遑論個市仲係托少一陣都頂唔順的姿態。

俗語話生意淡薄不如賭博，惟昨日見中國財政部公布六月份全國彩票銷售，按年急挫21.9%至281.2億元人仔，累積首六個月亦只得5.1%增長，雖然話舊年因為有巴西世界盃，比較基數大，所以跌幅誇張咗多少，但以半年累積計，增幅創近年新低，多少反映民間經濟真係麻麻。

外匯基金派發半年成績表，上半年投資收入204億元，比去年大跌63.8%，主要揩咗非美元債券及股票。管錢大員照例話投資前景不明朗，下半年環境會更加困難之類。以管理3.31萬億元資產計，半年回報計落得0.6%，或年率1.2%，衰過二厘幾坐晒十年美國國債收息。

古勝睇見收六球幾年薪，年年喊驚話要小心美國退市風險，結果退市前夕輸喺美元升值潮上，香港人睇見都唔知應該好嬲定好笑。

行番大搞基建舊路

期指結算前夕，港股跟美股與A股反彈，可惜成交額不足限制升勢，埋單港股升115點，收報24,619點，主板成交反而縮至859億元。恒指會唔會在22,836點及24,140點完成高低腳見底？在下認為機會頗大，從非正式統計，唔少芬佬朋友除了揸現金、中移（00941）及友邦保險（01299）之外，都無乜好的投資idea。

炒家線方面，近排經歷股市絕世天劫，唔少見過鬼怕黑，索性清倉外遊去。咁嘅氣氛，個人印象中真係五年唔逢一閏，照睇後市短期反彈未完的機會仲係比較大。

講番股事，舊年十一月人行開始雙降，經濟依然未見起色，諗住谷高A股掀動財富效應，結果一場股災下，功虧一簣。話時話，雖則誓神劈願話唔會行番○九年4萬億元人仔銀彈投入基建的舊路，但種種迹象顯示，大有「今日的我已打倒昨日的我」的趨勢。早兩日發改委資料顯示，上半年審批的項目真係史無前例咁快，半年通過審批項目1,043個，總投資1.97萬億元人仔（下半年仲話會加快，又係4萬億睇落無走雞），當中基礎建設投資增長19.1%，遠高於整體投資7.7%的升幅。

龍頭股海螺係首選

中國可能再一次出現○九年以來最大規模的大興土木周期，水泥行業下半年境況應該有得諗吓，尤其近排見內地水泥價格喺低位逐漸有跌唔落的迹象。上星期所見，東南部地區更見有10至30元人仔的輕微升幅。

若博水泥行業轉角市，一定係揀大唔揀細，搵議價能力高，成本效益較佳的，海螺水泥（00914）屬當然首選。從水泥價回升的地區，斷估佢亦最先得益。真係唔平唔買，要高槓桿的先諗華潤水泥（01313）及中國建材（03323）。