絲絲講場：貝索斯45分鐘袋560億
過去幾日，科網股一刻天堂一刻地獄。周二蘋果業績一出，累科網股地震，中美科網股市值加加埋埋震走咗1.5萬億元，1.5萬億有幾多個零？總之多個你啲手指。一班揸重貨嘅富豪都中招，連股神巴菲特都唔例外。不過，亦有人喺45分鐘內身家多咗560億元，即係每秒2,074萬。嗱，你睇埋呢句嘅一秒，佢又賺咗5架法拉利。
Apple一晚唔見五千七億
呢位一秒等如好多人成世身家嘅，就係亞馬遜創辦人貝索斯。多得亞馬遜呢個仔夠生性，業績好過預期好多。周四公布完業績股價就係咁升，帶挈貝索斯喺短短45分鐘帳面賺咗560億。如果養大一個B要400萬，560億足足夠1.4萬個B由BB班讀到上大學，年年報足11個興趣班都仲得，不過唔包上車。
有人歡喜有人愁。蘋果（Apple Inc.）就因為業績差過預期，周二盤後股價一度大跌近一成，市值一晚蒸發咗5,727億元，即係無咗差唔多半間滙控。
艾肯身家縮 股神也中伏
揸重貨嘅大孖沙身家大縮水。著名維權股東艾肯五月時先唱好蘋果股價會上到240美元，點知周二股價插到去121.99美元，佢副身家估計唔見咗53億元。股神巴菲特一樣領嘢，佢嘅愛股IBM業績同樣唔爭氣，周二股價急挫，累股神身家縮咗70億。
不過股市嘅嘢，今日以為蝕咗，聽日發現賺番突，但後日可能又唔見咗一截。Google早一個星期業績好省鏡令股價急升，市值一夜飆5,000億，點知呢個星期跟番大隊齊齊跌，市值一晚忽然就咁無咗2,000億。無論有幾多個零，都只係如夢如泡影，發完夢瞓醒，下周請早。
余絲韻