騰訊（00700）同阿里，兩家喺業務上已經鬥到難分難解，今回連業績公布日期撞到應一應，齊齊都喺八月十二日。兩間公司當晚都會搞分析員電話會議，阿里就晚上七點半開始，騰訊就晚上八點先開始。噢，差半粒鐘，阿里叫做贏咗個馬鼻添。
騰訊一向都喺咁上下時間公布中期業績，今次反而係阿里提早咗公布首季業績。有傳因為阿里嘅投資者關係部換咗負責人，所以時間上有啲變動；亦有傳係因為要遷就雅虎計劃分拆旗下Aabaco獨立上市喎。
今次兩邊嘅分析員會議時間咁接近，已經有分析員向絲絲呻分身乏術頭痕。