絲絲講場：港美股神睇樓兩個樣

巴菲特希臘買島起屋

今次希臘嘅債務危機，希臘好似叫做透啖氣，但實情係全世界仲好懷疑呢個火地獄唔知燒幾耐點收科。話口未完，股神巴菲特上星期四就扯埋意大利富豪Alessandro Proto一齊，飛身撲入火坑，兩個夾份用1,500萬歐元，即是大概1.26億港元，買咗個希臘小島，仲講明話搞地產話起住宅添。

個島仔叫Agios Thomas，喺愛琴海近比雷埃夫斯港，個島面積1.21平方公里，即係1,302.5萬方呎。照計，呎價即是9.7港元。抵唔抵？絲絲唔曉計，只知啲磚頭應該好燙手，凡人好難拎上手。

陸東逆市少揸港樓

至於星級分析員陸東，因個人理由暫別咗股壇半年，上星期先復出。呢個時候人人衝去揸磚頭，陸東尋日竟然話，佢依家嘅個人資產配置，磚頭佔比係歷史新低，皆因港樓供應增，樓價再升空間唔大。

嗱，佢話自己唔係睇淡港樓。得得得，呢啲唔叫做「睇淡」，只係愈揸愈少咁啫。

依家啲細價樓升得勁過啲大價樓，發展商又專推細單位，買樓人人興買細。點知陸東就話「如果講得涼薄啲，呢類單位好難住，一旦樓市出現調整，呢啲單位冇乜人會買。」

講到年輕人上車難，陸東仲直接，話錢「如果放喺銀行，一世都儲唔到首期」，應該要「錢搵錢」投資生息先得。佢自己都係八九年先首次買樓，當時樓價都只係千鬆啲蚊呎，連佢都覺得儲首期難。

好似呢兩位咁睇到「危中見機，機中見危」，你都得？咁當全世界得番你自己咁睇，仲夠唔夠膽講出嚟，甚至行動埋先？所以話，股神基本功，其實都係嗰份能夠力排眾議獨立思考嘅勇氣同自信。睇得準唔準，Wait and See。