絲絲講場 :維達紙婚紗「騷」得起
紙巾，爭輸仔爆喊時可以用嚟抹乜都好，爭贏咗時一樣可以用嚟做婚紗。紙巾商維達（03331）真係整咗件「紙婚紗」，仲趁尋日發布業績時，同場加映埋全港首個「紙婚紗」真人Show。維達主席李朝旺仲保證「紙婚紗」夠韌力，濕水都唔驚爛。
大賣場爭邀展示
呢件「紙婚紗」製作要三個星期，仲要度身訂造。絲絲親手摸過，原來中間加咗層裡，連着住嘅Model姐姐都話件「紙婚紗」輕得嚟又夠立體，最緊要係唔刮身。
維達舊年出過「紙婚紗」小模型，今次出件真人着得嘅，聽講內地大賣場商家爭住要維達去Show添。會唔會喺香港落區展示？李主席話要睇吓先喎。
你都想整件？Sorry，「紙婚紗」現屬非賣品，不過李主席話「若作慈善用途，我哋好願意」。「紙婚紗」話唔定有Market喎，李主席不妨諗諗。