孖妹S檔案:會計雙雄教揀股渾身解數

恒生指數上周現「V煞」,嚇到孖妹心都離埋。會計雙雄睇唔過眼,話要教大家拆解上市公司財務報表密碼,揀出較穩陣兼最快翻身嘅優質「冧巴」,為股災可能重臨預先打定強心針。孖妹同佢哋傾完計,都不知不覺沾染到陣「穩勝」磁場呀!

林:執業資深會計師兼會計專業發展基金主席 林智遠(Nelson)

鄔:資深會計師兼新昌營造(00404)合併及收購董事 鄔碩晉(Wilfred)

Kitty:你哋兩位資深會計師入咗行廿幾年,擅長拆解上市公司帳目,近年積極執筆寫股,最近仲出埋書。聽聞你哋分辨「妖股」嘅能力極強,難怪一個叫「熊貓燈神」,一個叫「IPO殺手」啦。

今次港股「死而復生」,唔少股友見過鬼怕黑,想轉投保守派。不過份財報又長又多數,對散戶嚟講好大挑戰喎!

林:睇財報係為咗分析間公司嘅盈利同資產質素好唔好。好公司喺跌市時抗跌力高,唔好嘅就自然會跌得「甘」啲。曾經有監管機構做過市場調查,發現入市前有研究財報嘅投資者,即使無贏大錢,但輸錢嘅比例都大幅減少。

其實除咗將財報同基本面互相結合,我做分析時亦會配合政策因素,以及從生活化角度出發,諗吓自己消費時會光顧邊間公司。

彩兒:近月嘅熱門板塊不外乎銀行、證券、科技,其次較大路嘅亦都有資源股。不如就從呢幾個板塊入手啦。

內銀股「阿爺」撐腰

林:銀行股抗跌力強係人都知,不過升市時亦慢人幾拍。行業增長主要來自利息收入,所以分析財報要關注淨息差。我認為本地同外資銀行中,恒生(00011)係首選,因為佢業績比較穩健、抗跌力高,港人對佢亦似乎有種情意結。

至於內銀股嘅不良貸款及撥備比率就一般較高,不過有「阿爺」撐腰,相信板塊長線向好。四大內銀股中,我比較睇好工行(01398)及建行(00939),佢哋目前嘅PE(市盈率)較低,而農行(01288)嘅撥備就比較高。投資者不妨等埋內銀股下個月嘅中期業績先部署啦!

Kitty:券商近月生意額大增,買券商股係咪更有着數?

林:券商盈利主要來自佣金收入或新股包銷服務。經過今輪跌市後,相信市場投資氣氛會受影響;成交下跌,就會影響券商業務,所以券商股抗跌力有限。

科技股計現金流

鄔:除咗毛利率及盈利增幅,分析科技股時,應該更着重公司嘅營運現金流及存貨周轉期。當盈利同營運現金流唔成正比時,就等於你做咗生意、有錢賺,但原來收唔到錢,咁啲錢即係去咗邊?現金流唔足夠,就會影響公司派息政策。

另外,若公司存貨比例高,即日後或需為過時嘅電子產品減值,影響往後公司盈利能力。

林:「股王」騰訊(00700)一向係板塊焦點,亦係基金愛股。公司收入健康,相信只要業績做得好,股價就會反彈。另外,建議投資者亦可留意「蘋果公司概念股」,因為Apple產品受歡迎,你唔買iPhone,又唔想買美股,咪買相關港股囉,例如瑞聲科技(02018)。

資源股睇重業務

鄔:揀資源股,最緊要先認清公司經營模式。部分公司本身有油田、石礦等已開採資源,已有穩定收入;部分公司就以收購形式擴大業務,投資風險會大啲,因為有太多未知之數。開發係咪成功、成本要幾多、併購效益有幾多……呢啲嘢,單靠財報未必睇到。

彩兒:唔少散戶都吼住「石化三雄」,諗住遲早會受惠油價反彈。

鄔:其實我自己都有買油股,其中一隻係中海油(00883),因為覺得目前油價過低,油股長線會隨油價回升。而且公司業務穩定、現金流高、PE低,派息紀錄亦唔錯。

個人保守揸長線

Kitty:你哋揀嘅股份咁穩陣,個人投資係咪都貫徹保守作風先?

林:我個人投資傾向保守,依家只揸住三隻股票,分別係港鐵(00066)、盈富基金(02800)及領匯(00823),佔資產配置唔夠一成,因為自己本身都有物業。平日專注工作,都無咁多時間睇市,買股會以長線為主。

好多人都忽略咗,其實揸樓等於間接買重地產股,供樓嘅人普遍做六、七成按揭,即係用緊好高孖展買地產股。呢類人再買股票投資就要小心,唔好再買地產股喇,建議考慮公用股。

鄔:我就比較進取,手頭上只有兩隻資源股,佔資產比例接近五成。不過,喺MPF(強積金)方面就會平衡風險,揀番啲保守性嘅投資。

彩兒:會計師數口咁精,甚至到達「算死草」嘅地步,會唔會嚇走晒心儀對象o架。

林:我哋只係對數字敏感啫,未諗賺、先諗蝕,風險管理做得好,但咁樣唔等於算死草。會計帳目有一欄叫「Immaterial Items(非實質性事項)」,專門將無關痛癢嘅數據入帳;現實中嘅我哋亦一樣,日日睇住盤大數,對於小數目根本唔會過分斟酌。

Kitty:Wilfred你被稱為「IPO殺手」,抽新股係咪百發百中?

鄔:哈哈,呢個稱號源於我近年分析過四隻覺得有問題嘅新股,其中三隻上市後都潛水,命中率高達75%。但其實我過去十年只抽過一隻新股,就係早前同中國南車合併嘅中國北車(現稱中國中車,股份編號01766)。

當時睇好北車前景,即使股份招股只錄輕微超購我都照抽,上市首日潛水我亦無走,可惜之後升到中途我就落咗車,賺幅僅約三至四成,食唔到後期受惠「一帶一路」及兩車合併嘅升浪。

Kitty、彩兒

若有料報畀彩兒同Kitty或有嘢問,可電郵money.biz@on.cc