Market Insight：航空股炒重組概念

港股自低位勁彈超過二千點，中資基金當港股提款機恐慌拋售，跌到七個一皮的二三線股，低位喪彈過倍的亦多不勝數，一直有唔少人相信股市恩主論，港股無北水會死，經過今浪斷估都站唔住腳。

上周五，港股再升508點收報24,901點，完全回補周三急跌留低的24,411至24,819點的下跌裂口後，即市未見大戶趁反彈減磅手影。聽賓架消息，唔少long only的傳統基金，周四、五都有出來打中資基金的落水狗，來個人棄我取，照睇今浪似仲未升完。

暴力托市後患不少

事實上，退後一萬步睇，海嘯之後，恒指由16,170點谷底回升，幾年來指數調整的低位，有逐年上移趨勢，現時上升軌支持大約在23,200點左右，上周三即市已見咗，唔能夠排除連跌四星期，上周出現單日超過兩千點跌幅的港股，一個中期重要低位已經出現。

同時，現時藍籌股平均市盈率不足12倍，在歷史區間中下限，要在這情況下出現股災，的確是匪夷所思。講到底，如果不是四月大部分股市參與者（包括在下），表錯情以為北方大潮湧港，一廂情願以為啱大媽胃口的股份，預先炒到半天高後大玩笨豬跳，今次跌市死傷情況，應該無家陣咁嚴重。

今次北京暴力托市，幾可肯定衍生不少後患，國家隊包括養老金及保險公司所買入的股票，能買不能賣的股票點收科？情況如同IPO時開時停，重啟消息傳親個市都死，國家一旦話可以鬆綁走人，咁多蟹貨個市點算？

再者，銀行與證券行因為阿爺命令，對上市公司股東置押，證券行客戶孖展貸款，被迫抱住隻眼開隻眼閉態度，個市真係挾得去4,500點樓上還好，萬一唔升甚至插深啲啲，壞帳最後邊個孭？所以形勢明朗化之前，為國出力，卻罔顧小股東利益的內銀、內險及券商點評估，真係唔識睇，但外資短期肯定會加一個相當高的風險溢價因素。

希臘攪局累己累人

希臘國會以大比數通過新緊縮方案，交畀德國為首的歐元區財長，意外地加稅及改革退休制度的內容同全國公投前出奇咁似，搞完一場大龍鳳，等人以為全民授權可以轟轟烈烈打番場爛仔交，結果幾咁反高潮。

執筆時未知最後結果，但形勢似乎五五波傾向有少少兇險，尤其是經過公投後，希臘銀行停業兩星期，全國歐元現鈔比存戶撳得八八九九，衰到剩番條底褲咁款至跪求援助會唔會遲咗少少！對於股市，係生係死得個明白，唔使再拖住死唔斷氣，不失為置諸死地而後生的快事。

國際能源組織的需求預測疲弱，加上北美復開油井數字回升，五月開始在55至62美元浮沉的國際油價，終於頂唔住地心吸力再往下沉，上周紐約期油最低落到50.5美元一桶水平。對於夏季外遊數字回升，燃料價同時又回落的第三季的開局，無疑是一個唔錯訊號。

上周南航（01055）發盈喜，按內地會計準則半年業績虧轉盈，獲利34億至36億元人仔，相比一四年同期的10.1億元人仔虧損大有改善。其實以一四年上半年油價在過百美元水平浮沉相比，今年航油成本大減是意料中事，且南航上半年的運輸周輸率有明顯改善，業績谷底反彈的效果也進一步增強。

南航業績成功翻身

南航上周deep V兼升凸，由8.2元跌到周三股災見6.09元，上周五收報8.27元倒升，較恒指、國指仲要跌4.4%及5.9%強，業績好固然係主因之一，現時綜合券商預測全年賺60.1億元人仔，現在半年已達目標五成八。

此外，南航、東航（00670）及國航（00753）三巨頭重組的消息又落鑊，未重估前的大行預測計，一五年PE只係10.2倍，以一六及一七年18%及14%的盈利增長率，現價唔貴兼有炒作故事配合 ，大市能唔能夠返到四、五月高位好難講，但南航再見10.36元今浪高位機會睇嚟唔細。

古勝