絲絲講場：餘額寶召喚股民回巢
內地股民早排為趕騎瘋牛，有錢撳錢，冇錢就借錢，總之要入市。就係咁，餘額寶保唔住之前辛辛苦苦由銀行搶嚟嘅存款，畀人撳晒出嚟炒股。呢排A股跌成咁，餘額寶話大家係時候回歸佢哋懷抱「穩穩的幸福」。
支付寶國際總裁彭翼捷（Sabrina）出席星展洞悉亞洲高峰會時，唔係幾想評論內地股市，追問下先話過去幾個月佢哋餘額寶的確走資；但近幾星期資金已經返咗嚟，依家大家都知穩定回報嘅好咁話。
追求快錢靠唔住
比起餘額寶一年唔夠一成回報，股民梗係追求股市翻倍回報啦！Sabrina都話，內地投資者成日想賺快錢，唔信長期穩定投資回報，市場真係好唔成熟。
同場點融網創始人及首席執行官蘇海德（Soul）都話，近期股市旺，佢哋P2P借錢平台交易量都多咗，希望呢批借錢客冇損手、有錢還咁話。
余絲韻