絲絲講場：股災煉出爆笑奇招

一心求停牌 日常當反常

深交所催迫下，先前自行拉閘嘅上市公司惟有復牌。停牌就可以「籌劃重大事項」為理由一筆帶過，但復牌要「打圓場」，於是啲復牌公告就創意極無限。

有間光伏公司好有哲學Feel，話之所以停牌「因相關事項是否涉及重大事項存在不確定性」，依家確定咗「上述事項屬於公司日常經營業務的一部分」，所以咪復牌囉。咁「相關事項」係乜？冇講喎。

高層撐公司 千二蚊回購

中證監一聲令下，唔少內地上市公司大股東同高層即刻增持股份撐市，仲嗱嗱聲出公告話畀全世界知「任務完成」。其中梅雁吉祥嘅監事應承回購至少300股，計返即係頂多出大概1,200蚊人仔，立即被網民窒佢攞買餸錢Hea撐。唉，又係奀啲嘅……

IFC男廁 撞到索羅斯？

呢排盛傳大鱷現香港，話有人喺IFC個男廁撞到索羅斯，轉個頭又盛傳話內地請咗班九八年亞洲金融風暴嘅「打大鱷高手」去救市。不過，尋日有內地傳媒引述索羅斯發言人澄清話，索羅斯超過一年冇嚟過香港，依家喺美國長島屋企，仲話佢已經冇參與基金嘅日常運作。咪住，呢個發言人究竟係唔係堅嘅先？

超技術長文 驟變護身符

有電器公司幾咁擔心你唔熟佢嗰行，所以要停牌Check吓呢行有乜新技術。話Check完依家復牌，就送上一篇300字嘅超技術文，教你比較唔同電視技術嘅畫質。應該要查字典先睇得明，多謝晒。

無辦法拉閘 哭暈鍵盤上

有公司就食咗誠實豆沙包，前兩日喺投資者互動平台直認想停牌，只係搵唔到個似樣嘅理由停，仲話「已哭暈在鍵盤上」，請投資者諒解喎。實情係，好多股民話「跪求」啲公司停牌，仲話停牌先至係「良心企業」。

余絲韻