絲絲講場：培力主席首創吉盒賣貴貨
連鎖藥房賣貴價保健品，好似靈芝、蟲草乜乜乜，一般只會喺貨架展示個「吉」盒，顧客去櫃枱畀完錢先有實貨攞。大家都知咁係為咗防盜，但有冇諗過呢種做法係幾時開始？條橋係邊位諗出嚟呢？
一條好橋沿用廿幾年
諗出呢條橋嘅，就係本地保健品股培力控股（01498）創辦人兼主席陳宇齡。話說廿幾年前，某連鎖藥房保安問題唔敢賣貴價保健品。「幾百蚊一樽嘅，畀人偷咗咪死？」陳宇齡當時就諗到用「吉」盒Display呢條計仔。於是，廿幾年前嘅智慧，就一路用到依家。
培力控股尋日首日掛牌，送咗隻金靈芝畀港交所（00388），陳宇齡屋企人仲專程由多倫多飛十幾個鐘嚟香港撐場添。
余絲韻