絲絲講場：港交所不再最值錢！
曾經大家望住港交所（00388）股價飆到311.4元，一齊見證住佢以超過3,500億元嘅市值，榮登全球最值錢交易所嘅寶座。可惜，大家又一齊睇住佢呢9日連續係咁瀉，股價一度插穿200元。按尋日收市價203.4元計，港交所市值得番2,435億，輸咗畀同樣有上市嘅芝加哥商品交易所。唉，我以前是冠軍……
市值三個月蒸發咗1/3
仲記得四月時，港交所主席周松崗先笑晒口公布港交所做咗交易所之王，點知個No.1寶座坐得三個月都未坐暖就要起身，市值仲唔見咗三分一。
不過周松崗尋日現身新股上市儀式，照舊好好笑容，心情似乎無受影響，佢仲提大家市況波動個陣要諗清楚先好決定喎。
周松崗坐鎮股價例升？
相信有股民一見到周松崗，就即刻定番啲。嗱，唔係因為周生嘅溫馨提示，而係因為佢出名係小股東心目中嘅「招財貓」。有小股東直頭同絲絲講過話，只要一有周生坐鎮股東會，股價就必升，仲要係急升嗰隻。
話時話，周主席平時較少會出席新股上市；依家咁嘅市況，如果「招財貓」多啲現身，話唔定可以旺到港交所爭番個冠軍返嚟。
余絲韻