絲絲講場：天韵靈牛保佑穩守招股價
近期市況急插，拖累埋新股，唔好話想大升，唔跌都算偷笑，好似魯証期貨（01461）與國聯證券（01456），令散戶損手，抽到一手即蝕八百幾與千幾蚊。不過，罐頭水果商天韵國際（06836）就好叻，尋日三隻新股中，得佢守得住個招股價，唔通關佢同港交所（00388）互送牛擺設，孖牛上，催到運？
山東訂製 全球獨有
睇番前日嘅暗盤，天韵表現本來跌一成，係三隻新股中最弱。去到尋日上市儀式中，天韵送咗隻琉璃牛擺設畀港交所做紀念。隻玻璃靈牛一出，股價Keep到上番水面，最高見過1.41蚊，較招股價多10%，雖然之後回落，收市都力保招股價1.28蚊。絲絲決定入晒隻玻璃靈牛數。
天韵話，送琉璃牛係寄望港股牛氣沖天，公司業務表現氣勢如虹蒸蒸日上，仲話呢隻牛係主席楊自遠特別喺山東物色訂造，全世界得一隻。
一隻手掌拍唔響，港交所按慣例，都會一式一樣咁送番隻銅牛擺設回禮，都係寄望大市牛氣沖天啦！可能互送「牛」真係可以Double牛氣o架！
余絲韻