絲絲講場：中港富豪唔見2650億
中港股市跌，啲富豪身家少咗幾多個零？有估計，單上個月，中港超級富豪身家就蒸發咗共逾2,650億元。今次跌市風眼係深圳創業板，以深創板公司藍思科技（300433.SZ）而榮登內地女首富嘅周群飛，帳面身家就唔見咗超過一半，身家蒸發仲多過阿里巴巴主席馬雲同騰訊（00700）主席馬化騰。咁內地首富萬達商業（03699）大股東王健林又點？
內地女首富身家減半
周群飛係乜人？有睇財經版嘅，你就知佢係內地手機部件業中嘅傳奇女子，之前乘市旺上埋市，六月時身家有成1,000億元，做埋內地女首富。之但係，唔夠一個月，藍思科技股價已較高位急跌50%，雖然佢暫時仲保住內地女首富個位，但身家就大跌578億元。睇住佢，你就睇到內地創業板幾咁風起雲湧。
至於內地首富王健林，齋計佢持有嘅萬達商業內資股，身家大減656億元，嗱，講明帳面咋。馬雲嘅阿里雖喺美國上市，但內地跌市引發經濟放緩擔憂，佢身家亦較今年初縮水304億元。至於騰訊馬化騰，身家亦唔見咗237億元。
不過亦有人走得快。深創板嘅樂視網（300104.SZ），佢哋董事長賈躍亭上月初就喺60、70蚊人民幣水位，減持咗大批樂視股，套現約25億元人仔。家陣樂視已回落到得番大概47人仔，所以呢，佢好世界時，網民超酸超唔Like。
仲有，港交所（00388）行政總裁李小加，亦可算係跌市「間接受害者」，事關佢獲獎授嘅約57萬股港交所股份，市值已較之前高位跌咗半億元，即係變相減薪28%！
余絲韻