Market Insight：數碼通強得有道理

藍籌股表現已遠比國企股好，國企指數昨跌3.3%，率先失守250日線；而國企股表現又冇細價股咁慘，「上半年股王」百靈達（02326）昨暴瀉45%，許多細價股主要靠「北水」炒起，現在要「班資回朝」自然成重災區；另大部分A股跌停板或甚至自行停板，想沽亦無從，套現惟有搵「港股提款機」，睇嚟細價股跌勢未止。

大市主板成交1,724億元，期指再呈高水，不少人對昨晚歐元區高峰會期望可為希臘吊鹽水，但過去幾個月希臘局勢總是虛則實之、實則虛之，當大家以為局勢稍為緩和之際，隨時又一盆冷水照頭淋。今次的期望是希臘財長已換人，執過位再起風可能有新局面，但總理齊普拉斯挾六成民意支持提交新建議，古勝實在樂觀不起來，等住希臘股市及銀行重開睇好戲。

滬綜獲眷顧跌最少

A股仍未止瀉，滬綜指在多路資金眷顧下「最捱得」，但收市仍跌1.3%，全日亦未試過上升，深成指和創業板均跌逾5%成為「失孤」。兩市共有1,700多隻股跌停，加埋有700多家公司停牌，全數2,808間上市公司其實得約300間公司「免停」，當然，亦有少數公司漲停，包括中行（601988.SH）、平保（601318.SH）、國壽（601628.SH）、中鐵建（601186.SH）及中交建（601800.SH）等。

不過，靠托住幾隻大藍籌，救市側埋一邊有何意義？唯一解釋是為滬綜指及滬深300粉飾，並令股指期貨空倉吃不完兜着走。雖然中金所限倉1,200手及嚴限套利套保倉，但滬深300股指期貨收盤再挫3.2%，全日跌7.4%，投資者沽不得現貨惟有沽期指。

救市愈多花招，股民愈驚青，最失敗的是將所有負面消息、負面評論完全隔絕，股民見到鐵幕一塊，不知背後有否不為人知的陷阱，最安全做法是沽之哉，滬股通全日再度淨賣出超過100億元人仔，現在仍有國家隊接貨，錯過機會可能蘇州過後冇艇搭。

托市亦造成許多奇景，中石油（601857.SH）無端端成為全球第二市值最大公司，市值僅次於蘋果公司，碰巧國際油價隔晚大跌8%，完全是價值錯配。

救市締造多項奇景

另一奇景是現時A股停牌數目佔上市公司總數28%，停牌就毋須再跌，大股東更毋須被指令接貨，做法無異於斬腳趾避沙蟲，更奇的是內地股民竟稱停牌的為「良心公司」。

表面看，停牌可減輕跌勢，但C股停牌，要套現就惟有沽D股，實際上是累街坊。而救市建議亦愈出愈奇，股評人水皮建議「券商鎖倉避免強平」，遲吓或有人倡議索性停市放暑假都唔奇。

外媒及外資繼續「唱空中國」，《彭博》將中國救市與一九二九年美國股災時相提並論，《華爾街見聞》話另一槓桿炸彈──股權質押可能被引爆，標普話中國風險較希臘更大。今年以來，已有576家公司進行股權質押，即將股票按倉，借得資金很可能是用於炒股，變成骨牌效應，所以亦可解釋近日愈來愈多「良心公司」停牌的原因。

全民焦點集中在股市身上，上半年經濟數據即將揭曉，但好像已無人理會。CPI和PPI最無驚喜，但近期油價商品回落將令PPI跌勢不止；出口有機會回復增長；消費和固投可能持續放緩，近期股市暴跌或令未來數據雪上加霜；最重要是下周公布的上半年GDP，一般預計未能保七，但觀乎中央救市的不擇手段，GDP數據隨時灌水。

想執平貨要睇膽量

另一重要消息是工信部再催促電訊商減價，要求在年底前完成降低上網費三成之目標，中移（00941）近期算跌得小，原因是投資者對半年業績有期望，或延續首季ARPU回升之勢，但下半年一旦被迫減價，業績可能將繼續倒退。

反觀數碼通（00315）昨升11.7%成逆市奇葩，其3G限速plan將由96元加至106元，截至六月底全年業績可肯定靚仔，升得算是有根據。但現時通街平貨，只爭在你夠唔夠膽去執，故此不如留定子彈等機會好過。

古勝