孖妹S檔案：A股災後變招 炒藝進修

張：廣證恒生策略研究部副首席分析師 張廣文

七月翻身恐難實現

Kitty：傳統智慧指「五窮、六絕、七翻身」，今年有無機會？

廣證恒生 張廣文	中環資產投資董事總經理 楊延德	霸菱 莊鈺洪

張：有啲難度，畢竟之前A股牛咗咁耐，兩、三個星期就話調整完似乎太快。預期市場需要兩至三個月消化，所以七、八月仍會係調整期；即使反彈，亦難有明顯突破。另外，企業中期業績估計唔會理想，加上中國經濟下滑，令A股「七翻身」更難實現。

「有問必答」溫故知新篇

買賣滬股注意事項

牛市未過 政策快落實

彩兒：睇嚟A股下半年依然「凶多吉少」？

張：咁又唔係。其實我相信A股牛市未過，因為目前流動性寬鬆，而且預計今、明年國家經濟轉型政策會加快落實。「國企改革、傳統產業轉型升級」係下半年至明年嘅市場主題，一旦有更多國企改革細節出台，話唔定A股下半年會再創新高。我認為，中游製造業同上游資源業最能受惠，所以好可能成為下一輪升市嘅領漲行業。相反，之前跑贏大市嘅「一帶一路」及互聯網+概念股，都已獲利回吐，下半年好難再爆出。

下半年投資策略

投資取態：審慎樂觀

看好板塊：中游製造業、上游資源業：受惠國企改革及傳統產業升級等政策

消費類如家電、汽車、白酒股：估值合理

看淡板塊：創業板、中小板股份

楊：中環資產投資董事總經理 楊延德

憂調整未完宜審慎

Kitty：你哋舊年底已經吼實A股重錘出擊，聽聞今年上半年賺幅都唔錯。下半年仲敢唔敢繼續押注A股？

楊：上半年公司投資A股回報的確勝預期，但下半年會謹慎啲，已經略有減持，因為個人覺得A股今年好大機會已見頂。雖然最大跌浪已過，但調整期真係唔知幾時完。

我認為，投資者買A股中長線可從基本面睇，喺高端製造業搵好股。內地打貪對白酒股嘅影響已明顯減少，板塊目前估值唔算高，同樣值得考慮。至於近過去一年曾先後跑出嘅券商股、「一帶一路」及互聯網+概念股，估計下半年表現最多只與大市同步。

還要睇外圍貨幣政策

彩兒：「阿爺」連番救市都屢救屢敗，唔通個市真係無得救？

楊：我覺得中央出招係想為股市提供「降落傘」，等佢有序下跌，而唔係暴跌。雖然未必成功，但至少令市場無咁恐慌，過度急跌嘅機會率就會細咗。調整期結束後，A股可能會以「慢牛」姿態出現，不過下半年能否繼續健康發展，就要視乎外圍市況、貨幣政策、有冇更多國企改革細節出台等等。

下半年投資策略

投資取態：傾向保守

看好板塊：家電股及白酒股：估值合理

內銀股：受惠國企改革

看淡板塊：創板股

莊：霸菱亞洲區（日本除外）分銷部銷售、客戶服務及業務發展總監 莊鈺洪

A股神話料可延續

Kitty：A股近日跌勢唔停，「狂牛神話」係咪已經破滅咗？

莊：最近內、外圍都充斥不利消息，打擊投資氣氛，尤其A股早前已累升不少，對市場敏感度會提高，所以導致今次回調，但我相信尚未進入熊市。雖然中央救市措施唔係即時奏效，但我唔認為A股神話已經破滅。

我中長線仍然睇好A股，因為預期「放水」效應會喺下半年反映，加上目前流動性良好、內地經濟下半年有望回穩，預期可帶動企業盈利增長。

做功課迎牛市第二波

彩兒：小股民今次跣得咁傷，睇怕都好難再對A股重拾信心。

莊：A股始終係新興市場，波動性仍然較大。相信經歷過今輪回調後，投資者日後再買A股時，風險管理意識及防守能力會更高。

本港投資者日後買A股，就要再做多啲功課喇。我預計今年當A股進入牛市第二波時，行業間及同業股份嘅表現差異會增加，所以要認真研究，搵出價格合理兼盈利有增長嘅個股。同時，除可留意個股嘅AH差價外，亦可研究個別行業中未有喺兩地同步上市嘅股份，對比吓佢哋嘅價格係咪同步。

下半年投資策略

投資取態：樂觀

看好板塊：內銀內險股、內房股：受惠減息、估值便宜

內需股、健康護理、新經濟股：受惠國策支持及經濟增長

看淡板塊：創板股

高妹、彩兒

若有料報畀彩兒同Kitty或有嘢問，可電郵money.biz@on.cc