Market Insight：多招齊發料見成效

其實股市好簡單，多人買，少人沽，個價自然會起。缸邊花生友笑言不如阿爺准買唔准沽，個市實升！內地救市法寶盡出，但見股市愈托愈跌，日日破底，輸到慌的股市大媽，對政策干預已經麻木，更造成惡性循環。

上星期五嚴查淡倉消息，滬綜指曾經由最多跌7%變為倒升，但早市唔少股票一開跳價急跌一成停板，見反彈鬆綁貨又再湧出，斬得就斬，大媽要錢唔要貨，最後滬綜指埋單跌5.7%或225點，收報3,686點，累積一星期，滬綜指跌12.1%，已經連跌三星期，合計瀉掉28.6%，絕對夠晒資格列入股災級跌市。A股市值短短時間蒸發近21萬億人仔，真係閒閒哋可以買起十個八個希臘。

預期管理過度自負

事後孔明，今次A股大冧檔，原因之一上星期講過，泵水多時實體經濟卻一直無起色，同時股民對經濟復甦又幻想過分美麗，兩者落差加埋過度槓桿，一跌就立即出現人踩人。上周兩融餘額減少1,900億元人仔，比前星期多三倍，股民一字記之曰「斬」，爭先恐後沽貨。

講到尾，另一敗筆之處就是阿爺對市場的預期管理，實在信心爆棚到有點自負，以為央媽可以透過中證監加強兩融規管，做到溫和調節股市之效，卻忘記了A股向來一放就亂、一收就死的特質，結果最後一根稻草一壓下，多多政策都托唔住。

上周五收市後先來三招托市，人行經過14間金融機構，開展中期借貸便利（MLF）操作2,500億元人仔，期限六個月，利率3.35%，繼續流動性管理灌水浮股；同時即減IPO數目並擴QFII額度，避免新股上市活動抽走游資，提高外資基金入市便利；三係批准中國保監會基金，預計規模3,000億元人仔，投資向主要圍繞國家產業政策，好似「一帶一路」、京津冀協同發展、長江經濟帶等戰略項目等。阿爺被炒家牽着鼻子走，政策早就流傳，從周五晚夜期毫無反應可見。

指數重磅股先受惠

可能因為咁，上周六又再投擲救市核彈。阿爺揼21間券商心口，4,500點樓下挾錢掃至少1,200億元人仔A股ETF，跟手叫停晒所有IPO，就連已經收錢的都要退，干預手法可以說是史無前例咁粗暴。

今次信定唔信？古勝相信今次點都會有些少威力，話就話1,200億人仔唔夠滬深兩市一日成交額一成，不過真金白銀入市干預先例既開，唔得再加碼變得理所當然。如果真係有阿爺口中的刻意放空淡友，等你彈到上4,500點再做過，無謂浪費彈藥亦係合情合理。

今次券商入市，限制只買ETF，正路係重磅指數成分股會最受惠。過去兩星期因為唔少A股一開跌停，基金斬無可斬，都揀成交深度夠，且與A股市場升跌關連性高的內險股開刀，一旦買番轉頭，應該是博反彈首選，順序以平保（02318）較合眼緣，其次係中國人壽（02628），冷選中國太保（02601）。

再延伸落去，萬一救市成功，把過去三星期恐慌逆轉咁巴閉，近排因為紅色熱錢撤離，隊到過晒火位的新經濟股，貪佢哋有炒味，夠彈力都可以諗諗。除補完裂口的阿里健康（00241）以及阿里影業（01060）一對孖寶之外，金山軟件（03888）同金蝶（00268）等近排跌得好勁，都可以睇睇。

匯市睇通希債事件

執筆時希臘公投仍然在進行中，周末時民調依然吃緊，未有任何一方取得較大的優勢。不過，英國賭波公司盤口所見，頗有白熱化的味道，支持債權人方案賠率熱到1.4倍，反之say no有1.75倍，開盤大員感受到「口裏說不，行為最老實」的人類習性。

事實上，當ATM連歐元20蚊紙都撳光，每人每日提款上限因此由60歐元跌到50歐元，過多幾日，唔知銀行仲有無歐元現鈔應市，希臘人最終怯於恐懼下屈服，機會仲係較大。

債權人都夠寸嘴，講明就算公投答案say yes，之前條件都要重新傾過。不過，由歐元兌美元近期守住1.10算，看來匯市已經睇通睇透，認定今次希債危機心理影響大於實際也。

古勝