絲絲講場：債王日日苦鬥「前度」
畀人飛，耿耿於懷係人之常情，債券大王亦唔例外。舊年格羅斯成70歲先畀自己一手創立嘅太平洋投資管理（Pimco）逼走，佢去咗駿利雖有成九個月，但仲好唔忿氣，日日準時三點同Pimco較量吓基金表現。
基金倒蝕輸畀Pimco
不過愈比格羅斯應該愈瞓唔着，事關佢依家管嗰隻駿利基金唔止輸畀Pimco，仲輸埋畀其他78%嘅基金，由佢接手到今個月初，仲要倒蝕0.8%。
諗住隻駿利基金喺格羅斯手上會變成Pimco第二？Sorry，格羅斯講到明唔止無諗過，仲質疑無人做得到。理由係佢話自己後生時勁到無人有，專做啲人哋唔做或做唔到嘅嘢，好似連續3個月日日喺賭場玩21點玩足16個鐘，同埋6日內跑6場馬拉松咁，就係要咁盡先搞到間Pimco出嚟。
不過，格羅斯都知「剎那光輝唔代表永恒」，仲話自己同NBA名將高比拜仁一樣英雄遲暮。絲絲聽聞，有傳高比仔出年退休，咁債王又打算幾時退下火線？
余絲韻