Market Insight：外圍變數多宜觀望

希臘實施外匯管制，全球股市經歷「黑色星期一」，但作為風眼之歐股及歐元跌幅不算大，而恒指跌幅稍低於日經但高於其他亞洲市場，看來無甚特別，惟要憂慮是A股未止瀉，後市要面對兩大風險。

恒指昨跌穿100日線，並略為回補四月八日（大時代復市首日）上升裂口頂部，預計最差亦可頂得住25,000點。在下講過在25,500點可考慮撈底，「七翻身」有一定值博率。不過，希臘有頗大變數，所以買股幾時都係分段吸納較為保險。

希臘七月五日搞公投，如果表決結果是向三巨頭say no的話，後果顯而易見，希臘洗定屁股等住脫歐。然而，民調顯示支持妥協留在歐盟的卻佔大多數，但班債主亦相當決絕，唔肯寬限多幾日，究竟有否轉圜餘地，這星期成關鍵。

切勿低估干預能力

大摩認為，未來十二至十八個月希臘退出歐元區的機會由45%升至60%，資本管制實施後得兩個選擇──解除資本管制或退出歐元區。希臘新上場左翼政府搞出個大頭佛，唔知點收科之後丟給公投表決，兩個結果都是不利，同意妥協即對政府投以不信任票，希臘肯定有排政治立立亂，但唯一好處是打擊其他歐洲左翼政黨氣燄。

至於A股反彈可謂曇花一現，中證監見勢色不對，急急發布稱「兩融風險可控，強制平倉規模很小，融資仍有增長空間」；外電亦報道內地考慮暫停新股發行，中證監搵埋券商開會但不知所為何事。滬綜指暫時止咳，重返4,000點樓上，尤其四大國有銀行A股全部轉跌為升，幾隻保險股亦撐住，國家隊有否進場維持秩序則不得而知。

滬深300股指期貨持續低水，最大沽壓顯然來自斬倉，空軍未必敢捋虎鬚，皆因央媽及中證監為托市可以去到好盡。雖然連組合拳亦冇料到，央媽似乎黔驢技窮，但阿爺的干預能力隨時估你唔到。

聯控上市唔啱時辰

A股昨日奇葩亦包括航空股、電力股及石油石化股，仍係炒重組概念，內地三大貨運航空公司合併，已惹起投資者對三大飛機股憧憬。不過，就算合併重組也是效果短暫，以「世紀合併」的中國中車（01766）為例，內地最大客戶鐵路總公司為爭回議價能力而訂單大減，而國外則受日本新幹線以蝕本價競爭，合併不等於1+1=3，有時可能小於2。

阿爺咁心急托市的另一原因，可能是適逢亞投行昨日在北京簽約，A股再大跌很冇face，亦會影響「一帶一路」及A股入MSCI之信心。MSCI表明估值及波動均不會是考慮因素，但海外投資者眼見A股完全受資金及人為因素左右，真係唔驚就有鬼。

昨日掛牌的聯想控股（03396）收市僅僅未能守得住招股價，但個仔聯想集團（00992）跌5.6%在藍籌榜包尾，阿媽大部分盈利靠個仔，而一般控股公司存在折讓，邊隻較抵買唔使畫公仔畫出腸。聯控另一張王牌是弘毅投資，如果眼光準再順利在A股上市的話，投資升值可以倍數計，但A股前景可能要重新計數。

江山控股逆市呈強

雖然昨日個市大插，不過所謂有危有機，逆市奇葩自不然要密切留意。古勝留意到江山控股（00295）中段隨大市急插後，尾市狂抽上1.27元報收，逆市升近一成，成交激增至39球。原來公司主要股東保華嘉泰產業基金昨日喺場內以平均價1.088元買入2,000萬股，涉資2,176萬元，持股量輕微增至59.83%，江山向來貨源歸邊，加上增持行動證明大孖沙對前景信心爆棚，跟轉亦無妨。

另一隻奇葩金山能源（00663）亦係心水，公司剛宣布配股兼2供1，集資4.7億元。呢隻嘢可謂衰到貼地，依家洗心革面，將虧損之煤炭業務出售，轉行做石頭紙業務，都算係環保產業，但重點係配售代理同供股包銷商都係金利豐，1191同726早前供股後升幾個開都係由金利豐做，博得過。

古勝