孖妹S檔案：目標40歲退休 財技公開

超慳儲錢炒股月賺五成

仁：26歲股友 阿仁

阿仁讀高中嗰陣已萌生財務自由嘅夢想，目標係四十歲有三層樓喺手兼做包租公，為咗節流，仲試過兩年內每日限使50元嘅生活。佢工作首年儲足本金就投身股海，而今年內嘅投資回報翻一番，喺幾乎眾人皆輸嘅「六絕月」擁五成賺幅嘅「靚仔」回報。

股友阿仁及女友Sarah	專業投資者 梁帥聰	御峰理財香敏華

彩兒：你做理財顧問，月入兩、三萬，周圍咁多「月光族」，你每月至少儲到一萬蚊，都算叻仔。

仁：為免使凸，我開設兩個戶口，一個用嚟出糧，另一個用嚟投資，出糧後會將部分人工過數去投資戶口，戒除「用剩先儲錢」嘅習慣，我仲會月供2,000蚊美國生物科技同健康護理基金，做長線投資。因為成日出席商會活動擴展人脈助日後發展，應酬支出唔少得，依家已經唔算慳。我大學讀化學系，畢業頭兩年喺實驗室做，得9,500蚊人工，每月可以用4,000蚊供基金、2,000蚊畀家用、2,000蚊還學生貸款，每月零消費，唔買名牌，只使一、兩千蚊嚟節流。「超慳」都冇用，「開源」先最重要，我一一年用一萬蚊本金開始炒股，撞正歐債危機，嗰陣乜都唔識，只係跟財經報紙同投資論壇貼士入市，見到當時仲叫熔盛重工嘅華榮能源（01101）由八蚊跌到四蚊，以為好抵就跟風入市，點知四蚊跌到兩蚊都唔識止蝕！就係因為咁我就開始睇投資書自學，仲參加投資班增值自己。

Kitty：炒咗四年，你嘅本金跳升到六位數，係咪日日盯到實？

仁：藍籌股回報達唔到我要求，近半年嚟全力玩細價股，依家我每日會用一至兩個鐘刨通告、睇財技相關文章。我會留意港交所披露易資訊，翻查CCASS（中央結算系統持股紀錄），抽出股權集中嘅股份再分析，另外會特別注視有供股及配股等突發性事件嘅股份，例如股份供股後股權若更集中，我就會利用財經軟件監測成交再作部署。若持股爆升，最理想係翻倍後沽出一半，以零成本繼續炒，惟遇股份拆細或大股東高位配股就會套現獲利。另外，我會因應市況切換炒股主題，喺過去嘅「五窮月」同「六絕月」，我專攻「紅股除淨概念股」，貪佢同大市相關性低，早前喺CCASS觀察到博華太平洋（01076）有大戶大手掃貨活動，出現股權過分集中嘅情況外，股份幾日後仲公布每1股獲發15股紅股，所以咪走番轉，賺幅約五成。我都幾鍾意收購價貼市嘅全購股份，貪佢有「鑽石底」！即使上星期中港大冧市，都唔會太影響我嘅部署，最多睇實啲啦！

股壇15年已儲夠收山

梁：38歲專業投資者 梁帥聰（Clement）

百足咁多爪嘅股友梁帥聰（Clement）既搞生意，亦密密炒股吸金，喺炒股15年嚟生涯，一直屹立不倒。佢志在年賺最少五成回報，依家已經儲夠銀彈退休，但有得賺，又邊肯退？

Kitty：你除咗搞共用工作空間、投資班及賓館業務，仲日日喺魚缸搵食，好進取啊！

梁：其實喺30歲前，我曾經係一間外資公司嘅打工仔，不過當時憂慮喺職場被淘汰，於是決定自己做老闆，同埋用自己最愛嘅股票投資賺錢，最少可以親手掌握自己命運。○八年我避過咗金融海嘯，事關○七年底起沽貨獲利，海嘯前仲將餘下一成股票沽清；今個月頭，我都沽清八成倉，成功避開大跌市，保住年內1.5倍回報。即使每年跌市時間或只佔四分之一時間，但足已攞命，若見匯率、金價或世界大事甚不明朗、心緒不寧就會清倉；但勝算高時我會做滿倉之餘，亦善用孖展倍大回報，當然，止蝕一定毫不猶豫！港股上星期五跌近500點，所以短期內我會繼續輕裝上路，等七月跌定先再部署。

彩兒：上一輩股友鍾意長揸滙控（00005）同其他實力股，不斷滾大資金，你都會？

梁：七、八十年代至今，企業發展穩步上升，長揸有錢賺係正常，但發展高峰期已過，長揸難有高回報，依家炒股我最多只揸半年，主力留意業務突有大增長、由虧損走向盈利周期嘅股份，唔會追過去幾年勁升嘅股票，反而會發掘潛力股，半新股都係目標之一。目前我嘅投資主題包括O2O概念嘅傳統產業，貪佢股價相對硬淨；另科技實業股，特別係軟件股，網龍（00777）都係近期愛股。股神巴菲特講過：「人生如滾雪球，重要的是發現濕雪與長山坡。」不過滾雪球唔啱我，我重視資產流動性，投資組合會保持唔超過300萬元，賺咗錢唔會冧莊，定時拎盈利去投資有八至九厘、快將到期嘅高息企業債，再加小量槓桿，力爭逾十厘回報。

年輕人先節流再諗開源

香：御峰理財投資組合經理香敏華

彩兒：孖妹想四十歲前退休或者做到財務自由，可唔可以幫吓我哋？

香：好難喎，香港要花錢嘅娛樂太多，公園又少，相比下，外國拎本書就可喺海灘攤成日，而且想出街買杯雪糕都難，生活指數又低啲，所以先容易達到目標。喺過往加息周期，銀行存款都仲有三至四厘息，不過依家係低息周期，德國國債債息都係得約半厘，銀行存款幾乎零息，所以年輕人希望達到提早財務自由目標，就要喺開源節流出發。但入世未深，喺短時期內「開源」難啲，初期重點就落喺「節流」身上，重點係要消除貪圖奢華享樂嘅欲望，有紀律地節制開支，不妨將出糧戶口同儲蓄戶口分開，設立常行指示，出糧後轉帳部分人工去另一戶口，甚至狠心啲消滅儲蓄戶口提款卡。

Kitty：我唔買嘢唔舒服o架，你殺咗我啦！

香：美國個人理財網誌「錢鬍子先生」（Mr. Money Mustache）嘅作者早在三十歲就同太太退休，佢嘅理論係，若儲夠日後年度開支25倍金額，並實現每年4%嘅實質回報（計及通脹後相當於約8%回報）就可以退休。如果一個月使費係一萬元，一年就要儲12萬元，25倍就即係300萬元。以一個希望四十歲退休嘅二十三歲大學畢業生、每月賺緊大學畢業生中位數12,000元去計，一個月就要儲7,000元，變相初期只可以使5,000元。不過，緊記十七年後嘅一萬元，在計及通脹因素下，只相當於目前嘅5,000元，所以只可以算係窮退休咋。當然係未計及加薪同置業因素。

彩兒：每年穩賺8%嘅回報？唔易囉！

香：係啊！就算過去十年恒指計及股息率嘅回報有一成，但低息環境同資產泡沫都有機會拖低股息回報。我建議月供長線看好、但波動性高嘅市場，以彰顯平均成本法效果，未來十年我較睇好A股市場，中國經濟增長在環球市場中仍算高速，即使人口紅利釋放期已過，惟改革紅利在未來十至二十年仍可釋放；而屬前沿市場之一嘅印度，總理莫迪打擊貪腐與效率低落嘅官僚體系，呼籲外資投資當地基建，前景亦亮麗。

高妹、彩兒

若有料報畀高妹同彩兒或有嘢問，可電郵money.biz@opg.com.hk