Market Insight：手遊股估值唔算貴

上周講過，內地開戶人數放緩，湧入去接火棒的大媽開始減少，加埋半年結前水緊，之前炒家過分槓桿，終於令到A股近兩星期狂跌。事實上，滬綜指唔夠一年，自兩千點水平起步，直飆5,178點，經濟數據遲遲未見改善，一直肉肉酸酸，多少感受到內地今次經濟調整，有幾咁大鑊。

今年，美國以外，全球各國央行鬥貶值的遊戲底下，人民銀行死頂住人民幣匯價唔畀貶值，近數月十足十點咗穴一樣。講到底係中國要圓多年來夢想，冀IMF將人民幣入去SDR，躋身儲備貨幣之列。然而，股市需要放水及貶值雙管齊下，一直做得一半，股市狂牛與疲弱經濟愈加脫節，遲早都受地心吸力影響，趁六月半年結水緊股市插水，其實唔算好意外。

穩經濟招數似出盡

今年A股超過6%的跌市，居然已經有四次咁多。一月十九日因為規管兩融消息，滬綜指單日急跌7.7%，其後被命名「一一九」悲劇，起晒朵認真巴閉，澄清後翌日反彈1.8%。另外兩次是五月二十八日及六月十九日，滬綜指分別跌6.5%及6.4%，翌日分別微跌0.1%及升2.1%。

從過往紀錄，一來看到情緒散戶主導的A股，調整往往鍾意一步到位。上周五又嚟一次7.4%跌市，加埋人行打出混合拳，斷估今日開市會有技術反彈。問題係，A股由高位累積跌一成九，孖展客要計數的壓力唔細，會唔會趁反彈鬆綁，在下認為機會都幾大，尤其減息降準一齊出，樂觀看阿爺托市的力度，創咗今浪之最，但掉轉頭看，混合拳都用埋，短期要再見更大規模的穩經濟核彈，機會渺茫。

今日中港股市裂口開高之後，應該有一定壓力，短期爭持則在所難免。以中期走勢，滬綜指由1,974點浪底，升至5,178點見短期高位，黃金分割線一畫，0.382回調見3,954點先至係技術上較重要的支持。

券商前景令人憂慮

A股發高燒，即使一直無跟升的港股亦難免患重感冒。上周五有千四隻股份見紅，升跌股份比例，一面倒見5.7：1，恒指插481點報26,663點。藍籌跌幅全面，50隻成分股得聯想（00992）唔使跌，重磅股內銀成為重災區。

取消七成五貸存上限，二線內銀股威得一日，上周五民行（01988）跌4.5%，率先跌凸。A股轉弱，開始令人擔心券商放貸孖展的風險，海通證券（06837）跌3.5%，中信證券（06030）跌3.4%，HTSC（華泰證券）（06886）跌5.1%收報22.25元，月初先掛牌，上周已失守24.8元招股價。

老實講，今朝開得太高，即使倉底唔多貨，都實在無乜可以做，高追值博率唔高，索性搵番啲古仔配合，襟炒啲的股份較划算。講咗三個幾月，鐵定七月初轉主板的手遊股IGG（08002），上周五最多升一成一去到6.2元，之後中港股市愈跌愈多，即市一度幾乎無得升，但A股收市後即刻精神番，抽上5.93元收，仲有6.2%升幅。

因為兩款主打遊戲，《城堡爭霸》及《領主之戰》大賣，IGG業績三級跳，由一三年賺694萬美元，飆升到去年勁賺6,637萬美元。手遊營收得唔得，新鮮感同是否受玩家歡迎好重要，《領主之戰II》已接力推出，但《城堡爭霸》面世始終有一段日子。

IGG併購成催化劑

IGG今年推出的30款遊戲會唔會再有一個爆紅，有待時間證明，但五月出過通告話物色收購對象，卻是值得關注。上市後，IGG無嘢多，就係手頭銀彈充裕，去年底持2.03億美元流動資產，九成是現金及定期存款。舊年行家雲遊（00484）入股神魔之塔母公司，交易最後雖撻Q收場，但消息落實股價已即見大升，反映速食文化下，大孖沙情願見手遊公司真金白銀收購知名遊戲，都唔想等時間慢慢煲熱個game等收成。

IGG預期市盈率12倍，遊戲股之中算合理，但短期有轉主板消息加埋等緊落實收購，睇番股價四月初見9.16元後，橫行多時，上周五成交急升，短期可以睇實，破6.2元的50日線相信會一浸抽升。

古勝