絲絲講場：光大「一口雞飯」搞氣氛
光大集團昨晚特地為旗下光大証券喺香港君悅酒店搞咗個function，慶祝光証成功收購新鴻基金融，除咗主人家光大集團副董事長及總經理高雲龍等，仲請咗財經事務及庫務局局長陳家強、同埋中聯辦副主任殷曉靜等猛人做嘉賓。
慶祝晚宴保安嚴密
咁高興嘅日子，絲絲一心到場祝賀，但因為傳媒身份，被安排到一個傳媒房坐，不單止唔畀出去酒會吹水換卡片，連去洗手間更加畀公關跟出跟入，唔畀周圍走，直頭係一級保安安排。
絲絲乜都做唔到，本來滿肚氣。返到記者房，酒店員工居然捧出一碟好搞笑嘅嘢出嚟，係一碟叫做「一口海南雞飯」嘅食物，造型與近期網絡上好火嘅某超市燒味壽司一樣，都係一塊肉，放在一舊四四方方嘅飯之上。
同場記者試過，都幾好味喎，唔夠十分鐘就被清晒啦。睇嚟要出位，真係唔好怕醜，利用網上負評事件再推陳出新係一個好方法喎。
余絲韻