尋日阿里關聯公司螞蟻金服主導嘅「網商銀行」終於開業，目標仲好明確，就係幫小微企業解決借貸難嘅問題。現場好多人都以為，阿里巴巴主席馬雲設立一間專門幫小微企業借貸嘅銀行呢個概念，喺七、八年前先產生，點知馬雲語出驚人，澄清佢喺一九九二年已經有過呢個想法，立即引來全場一陣譁然！絲絲都O晒嘴，哇，23年前喎，使唔使咁前衞啊！
馬雲話，原來當年佢係杭州搞咗間小型翻譯社，想要借3萬元（人民幣‧下同）融資，但佢公司規模細，要借3萬元真係極之艱難。佢個陣湊埋所有家具同發票做抵押，係二、三個月內見咗好多人，歷盡千辛萬苦，但到最後都係借唔到錢。
有咁嘅切膚之痛，馬雲當時就想，如果有一間銀行專做小微企業借貸就好喇，於是就萌生咗呢個概念，但一直冇提起。依家佢終於如願以償喇。
另據外國報章透露，馬雲花2,300萬美元喺紐約阿迪朗達克山脈（Adriondack）裏買咗一塊佔地113.7平方公里嘅自然保護區地皮，呢塊地所在地名叫布蘭登公園，涵蓋九公里長嘅河流、還有湖泊，盛產鱒魚嘅溪流、池塘同森林。馬雲發言人話，馬雲買呢塊地係為咗環境保護，但也計劃作個人靜養之地。
余絲韻