絲絲講場：Fund佬最怕 24孝父母
東驥基金管理尋日舉行酒會慶祝成立25周年，場面熱鬧，董事總經理龐寶林（Paul）話，咁多年嚟見證住有客戶由後生到依家退休，近幾年公司一大挑戰就係愈來愈多父母贖回基金，用嚟幫仔女畀首期買樓。
咁唔知佢又會唔會幫打入咗港姐16強嘅寶貝女龐卓欣（Ada）畀首期呢？佢就笑笑話，自己已經有多個物業，唔需要啦。咁講法，Ada第二日都無上車煩惱。
龐寶林互認打頭陣
尋日多位財金界人士好似智易東方證券行政總裁藺常念、君陽證券行政總裁鄧聲興都到場恭賀阿Paul，但Ada就冇出現。阿Paul話佢寶貝女依家忙住參加港姐訓練，唔得閒嚟喇！
另外，七月一號就開始實施中港基金互認，阿Paul已經準備好北上大展拳腳，做先頭部隊，仲積極籌備緊喺前海搞基金，今年內又會成立多兩隻基金。佢對後市亦信心十足，話A股最多跌到4,000點，嗰時要大手撈貨，預計可以升過6,000點；港股今年就一定過32,000點，不過七月會比較波動，喺26,500點至27,500點上落。
余絲韻