美國財政部上個禮拜宣布要重新設計十元美鈔，首次換上女性頭像，但估唔到呢個計劃會惹起聯儲局前主席伯南克不滿。伯南克喺自己網誌度撰文，話畀女性抬頭固然係好主意，但就唔應該攞依家十元美鈔上嘅美國首位財長漢密爾頓嚟「開刀」。
伯南克話，漢密爾頓一七九一年有關成立美國鑄幣局嘅議案，為日後美國貨幣安排訂立基礎，將佢從美鈔上「剝離」，實在諷刺。相反，伯南克提議財政部為二十元美鈔「換頭像」，皆因二十元美鈔上嘅美國前總統杰克遜曾反對成立中央銀行，相信佢對於自己嘅肖像唔使再印喺聯儲局發行嘅鈔票上都會感到開心。
伯南克仲毫不留情咁勁踩杰克遜缺點多多，係個差勁嘅總統。不過，曾係局內人嘅伯南克承認，好難令有關當局改變主意，只能呼籲財政部盡力保住佢哋首個當家。
余絲韻