絲絲講場：華為小米爭做機王
時間過得真快，又差不多到內地智能手機銷量半年結嘅時候，內地眾多手機品牌中，小米手機銷量雖然首季輸咗畀蘋果公司嘅iPhone6手機，但仍然係內地手機銷量一哥。
尋日，內地就傳出小米最新嘅第二季同埋上半年銷售成績，連頭號競爭對手嘅華為同期成績亦揭埋出嚟，兩者比較之下，就出現小米半年結手機銷量仍然係內地品牌嘅第一，但手機營收就由華為勝出。
華為輸銷量贏營收
根據手機中國聯盟由供應鏈獲得嘅數據顯示，小米今年上半年出貨將超過3,500萬部，相比去年同期的2,600萬台，同比增長超過30%，而今年Q2，小米銷量將超過2,000萬台。而上半年計，小米手機營收為400億元（人民幣‧下同）。
之不過，作為小米頭號勁敵嘅華為，其第二季同今年上半年嘅手機銷售成績尋日同時曝光，話說華為上半年共賣出3,100萬部手機，手機營收超過430億元，在銷量上無疑仍輸畀小米，但營收就多小米30億元。分析指皆因華為嘅手機平均售價較小米高，因此營收就已經超過小米。
今年年初，華為和小米都曾經高調預測今年全年會賣出8,000萬到1億部手機，半年結結果為3,100萬對3,500萬部，餘下下半年，相信兩家公司仍有排鬥。
小米林斌預告佳績
對於小米手機銷售成績，小米總裁林斌就話好快就會揭曉，並且話到明小米嘅銷售成績將落晒其他國產手機廠商嘅面咁話。
余絲韻