小米同樂視早兩年跨界殺入智能電視機場，搞到傳統電視商銷情即時變成「慘慘豬」！事隔兩年，創維數碼執行董事兼行政總裁楊東文尋日同騰訊（00700）加強戰略合作記者會時，笑住口反寸小米樂視：「小米賣一年嘅（電視機）銷量，都唔夠我哋一日咁多。」
楊東文話，去年已銷售55萬台「酷開」品牌嘅電視機，有信心今年可賣出100萬台，佢仲話經歷過呢段時間，覺得硬件本身就係賺錢業務，呢啲競爭對手畀佢地嘅影響屬心理上居多，佢並且質疑對手銷情嚟緊可唔可以再倍增添！
既然創維喺銷量比併上贏咁多，絲絲就梗係問吓楊總有冇諗住出手「買起」小米，甚至樂視呢？不過，楊總話樂視係內地嘅市盈率成1,000倍咁高，如果跌到同創維差唔多，可以考慮合作吓，佢話傳統製造商同新進者都各有優勢，但佢哋嘅物流就比唔上創維，亦都唔明點解創維嘅市盈率咁低喎！
余絲韻