絲絲講場：小加領呔夠開動物園
港交所（00388）尋日慶祝上市十五周年，剛獲續約嘅行政總裁李小加自然人逢喜事精神爽，喺周年誌慶酒會一眾賓客中，小加尋日不但Gel靚個頭，出動到自家至愛嘅紅色領呔沖喜之餘，仲好親切咁同一眾靚女粉絲握手、自拍，有在場人士話見到小加心情咁靚，以為「深港通」就快宣布。
怕邪避開熊啤啤
究竟小加有幾多條紅色領呔？絲絲將呢條問題問港交所中人都冇人答得出，只係話唔止一條，當然，小加嘅衣着品味一向都好一致o架，喺今年二月就試過打「羊仔玩波波」圖案領呔襯番羊年，今次就係斑馬圖案，唔知有咩寓意呢？佢就話，自己都冇留意到條呔係咩圖案，「幸虧不是熊啤啤，係熊仔就麻煩啦。」
「唔喜歡自己買衫」
問佢平時去開邊度買衫？佢就冇正面回應，只係腼腆一笑咁話，「我自己唔喜歡買衣服。」咁又係嘅，小加事務纏身、貴人事忙，都好難抽到時間買衫，但如果小加有形象設計師，應該唔使絞盡腦汁日日諗新形象，買定熊仔圖案以外，唔同動物圖案嘅紅色領呔無限Loop就交足功課啦！
余絲韻