絲絲講場：股神「遺珠」大把人Buy
當唔少人都以為A股得個「炒」字，呢隻股偏偏同你講價值投資。公司唔只年年賺錢，仲連續十幾年都有息派，負債又低，符合晒股神巴菲特師傅、價值投資之父格雷姆嘅揀股準則，喺內地市場絕對屬奇葩。呢粒「滄海遺珠」就係魯泰紡織。
未聽過魯泰個名？Zara、馬莎你識喇啩，魯泰就係呢班國際品牌嘅供應商。雖然合晒股神選股標準，但股神竟然冇入貨。不過依然吸引到唔少星級投資者，好似股神老友蓋茨同佢老婆嘅基金會，挪威主權財富基金都有揸魯泰嘅股份，T.Rowe Price、首域投資仲有聯博舊年都有入貨，呢個排場絕對係星級陣容。
魯泰B股或轉投香港
除咗係星級心水，魯泰仲係少有符合晒股神師傅格雷姆嘅揀股準則。例如魯泰舊年收益有9.94億美元，遠遠多過格雷姆1億美元嘅標準。而且魯泰自九八年起年年都有錢賺，仲年年有息派，過去10年盈利年增長仲超過10%。
唔知係咪唔啱大媽口味，魯泰股價無好似其他股份咁炒上幾倍甚至幾十倍，不過升幅都唔弱，舊年年中魯泰A每股仲係9蚊左右，依家已經升咗成倍去到19蚊。年初有傳魯泰B股會轉會過嚟香港上市，香港投資者遲啲有冇得試投資呢隻股。
余絲韻