薦神：秦發不妨投機跟進
市場氣氛話變就變，但既然今轉升浪係「政策牛」，斷估中央亦唔想見到股市咁快玩完，故不妨將專注力放在細價股身上，隨時有意外收穫。
中國秦發（00866）主要在內地從事採煤、煤炭購銷、選煤、儲煤、配煤、航運運輸及港口業務。如果純睇業績，當然無太大睇頭。事關環渤海動力煤價格指數從一四年第一期的610點，跌至一四年最後一期的525點，並使集團截至去年十二月底止年度收入大跌四成，虧損更擴大至11.8億元人民幣。
不過，考慮到年內A股所產生的財富效應，除有利實體經濟，進而增加煤炭市場需求，集團早前亦指將集中於高毛利的貿易，故預期集團最艱難時期或已過去。
此外，據港交所（00388）資料顯示，秦發主要股東徐吉華及徐達共持有約63%股權，股權集中加上現時市值得12億元，細細粒股價話升就升。股價從六月三日的0.445元，升至六月九日高見0.67元後見調整，以細價股表現看，秦發這轉升幅不算甚麼，既然昨日股價可逆市升1.6%，不妨投機跟進，目標上試0.82元，跌穿0.48元止蝕。
帥哥