孖妹S檔案：三輩內地股男講炒作

20歲：學生初入市愛港股

歐：20歲大學生股民歐健偉

Kitty：你明明係內地大學工商管理系一年級生，點解有A股唔炒，偏要炒港股？

大學生歐健偉自己找資料做分析，曾經賺過三、四千元。	廖先生會維持六成股票，以管理風險。	盧先生全職炒股十五年，歷盡股市「牛與熊」。

歐：我初中已開始有財務自由嘅夢想，直至舊年年尾參加學校投資學會，識咗班志同道合嘅同學，因為投資學會其中一位來自香港嘅師兄炒股成績好勁，目前滾存帳面資產已經過百萬，而佢又只炒港股，另一方面覺得A股股民唔睇基本面，一味盲目炒作，實在太癲，所以我同四十幾位同學今年初就勇字當頭一齊開港股戶口，跟師兄一齊炒港股啦！

彩兒：你身為股壇初哥，交咗「學費」未先？

歐：開戶嗰陣，我用父母資助嘅一萬蚊本金起步，初初淨係識聽冧巴入市，後來先開始自己找資料做分析。阿媽前排仲添多5,000蚊擴大我投資額，之前帳面試過賺三、四千蚊o架，不過我求勝心切，買咗恒指牛熊證同個股窩輪，搞到輸番辛苦經營嘅回報，目前戰績只係打個和，只怪自己學藝未精啦。

Kitty：輸又輸過喇，之後有乜大計先？

走堂炒股 打工儲本

歐：展開炒股生涯後，我嘅生活由「聽歌、返學、放學打波」大變身。依家朝早會上網睇半個鐘市場數據先返學，中午粗略睇市，晏晝就睇投資書自學，晚上會留意股市新聞、國策發展、喺港交所（00388）搵公司年報了解公司基本面，休息時間由以往晚上十一時延遲至最早十二時半。喺四月份大升市時，我試過逃課炒股，暑假仲計劃打工賺錢加大投資本金。冇計啦，大學生涯最緊要係學好投資！

為免自己炒得太癲，閒時會睇其他書調節心情、同同學分享研究個股心得，亦會為投資訂立約10%止蝕位，控制風險。然而，因本金不多，我主要留意細價股，目前持股有中國銀河（06881）及能源國際投資（00353）。

30出頭：08買樓避過股災

廖：30出頭打工仔股民廖先生

彩兒：嘩！你○六年建倉投資A股，咪咁啱撞正A股○七年「最牛」升浪，同○八年「至熊」衝擊？

廖：我係醫療機構職員，當年喺股市高位嗰陣，因為計劃結婚買樓而分段沽出當時屬主要投資嘅A股基金，幸運地逃過股災一劫。

現時A股無論成交同投資工具選擇都比○七年進步，現時有期指同期權等對沖工具，而且又有「兩融」，即使跌市都可以做沽空。不過，預測股市去向可參考歷史，內地有「88%魔咒」嘅傳統智慧，即係當基金倉位水平達88%，A股市場會出現大跌，喺○七/○八年股災，以至近期跌市都靈，或可成為今次估頂參考之一。

揸貨限6成 嚴控風險

Kitty：你係廣州人，唔怪得廣東話咁叻啦！

廖：我成日睇香港財經節目o架，試過將喺節目學番嚟嘅投資策略，好似「買升唔買跌」、「股份升先分段加碼」等融入A股投資，發覺都幾啱使！另外，即使我分配畀A股個股投資嘅資金有幾十萬（人民幣‧下同），但係從來都唔會做滿倉，一般會維持六成股票，四成現金的比例，以免撞到大跌市乜都做唔到，旨在管理風險。

其實我炒得最癲嘅朋友，連返工都掛住用手機炒股，開頭個本係幾萬蚊，之後加碼到二十萬元，仲要經常All-in買一隻股，Keep住輸多贏少，慢慢揸Cash開始令佢不安同亂買股，可以股價跌五成都唔肯走，事關佢格言係「唔信你（股份）唔升」，所以就快輸到阿媽都唔認得。

彩兒：內地股民之中，你都算理智。

廖：為保理性，我會避免頻繁交易，短炒多數持貨一個月，大部分投資會持貨幾個月，仲喺交易軟件Set到價提示，落班返屋企先會用電腦詳細睇投資組合情況。滬深兩市A股我都有玩架，年頭仲可以齋睇資金流買貨，但依家有啲股份市盈率成千倍，點可以唔睇業績吖？創業板泡沫太勁，通常我會避開唔炒，最多只會運用兩、三萬蚊試水溫。

我今年內單靠揸匯添富民營活力基金嘅回報就有約1.7倍，另買入時代新材（600458.SH）嘅回報都翻倍，但係好揼心，事關兩項投資都買得太少！考慮到國策帶來嘅機遇，加上A股喺深港通開通後，勢被納入MSCI新興市場指數嘅預期，我認為A股市場未來可以升穿歷史高位。

40歲：15年戰績 長駐VIP房

盧：40幾歲全職炒家盧先生（以下對話以普通話進行）

彩兒：你曾於內地證券行任職，全職炒股已十五年，個人在九○年代初開始炒A股，可算是歷盡股市「牛與熊」！你年內回報達4倍，跑贏部分基金經理，不枉每天窩在證券行VIP房。

盧：初入股壇的首數年，當時市場結構與法制未完善，公募基金寥寥可數，市場上大多是散戶與私募基金，缺乏機構投資者，市場不時出現上市公司做莊，操縱股價的情況。

再者，心存賭念是中國人根深柢固的特質，以前股民是盲目地賭，不過現在理性一點，便是憑着國策走向去賭，再加上基金發展快速，機構投資者數量上升，整個股票市場已經理智不少。

當時最驚心動魄的便是發生在九五年的「327國債期貨事件」，正是法治、金融結構與交易制度未完善所引發的典型造市事件，惟內地交易所亦因此而找來人才，協助加快推動建設，使目前制度趨向完備。

「互聯網＋」炒完 轉跟國策

Kitty：你在A股市場打滾二十多年，怎樣看今次這波牛市？

盧：多年來，○七年股市最瘋狂，牛市對整個藍籌板塊，以至商品皆有推動性，惟目前中央是為推動經濟而造就政策牛市，有意利用調控為市場降溫，去達「慢牛」的目的。由於這一波牛市是具（國策）概念性的公司先行，藍籌股仍未破位而上，相信股市仍有子彈上衝，滬綜指約6,000點的歷史高位是肯定要破的。

上半年瞄準「互聯網+」概念股令我取得不賴的成績，惟因估值太高，相關股升勢已暫告一段落，近月已密密將持倉轉換為國企改革概念主題的受惠股。雖然市場上部分股份市盈率已逾千倍，惟一旦其盈利猛進，明年市盈率或可降至十餘倍，所以現時動態觀察非常重要，選股重點是看公司增長潛力，並須有話題性，保持個人清醒更是先決條件呢！

高妹、彩兒

若有料報畀高妹同彩兒或有嘢問，可電郵money.biz@opg.com.hk