絲絲講場：天鑄望遠鏡 欣賞「實景」
今時今日嘅新盤買家相當精明，買樓之前多數會去地盤望下樓盤外形同四周環境，但天氣咁熱，戶外睇地盤都咪話唔辛苦。新地（00016）尋日開放何文田新盤天鑄嘅示範單位，話晒個盤最細兩房單位入門都要二千幾萬，發展商今次出新招嚟錫住班客。
居高臨下一清二楚
個示範單位設喺九龍站環球貿易廣場（ICC）86樓，堪稱全港最高嘅示範單位。發展商就喺展銷廳特別安排咗個大型望遠鏡，畀啲客喺室內一邊歎住冷氣，一邊由ICC居高臨下咁眺望天鑄地盤同埋附近環境。絲絲試過，真係望得幾清楚。
余絲韻