港股大時代下，食大茶飯誘因自然大，利用人頭開戶愈來愈多。絲絲聽老行尊講，原來人頭戶都有高、低級之分，行內新趨勢係多咗班內地人做生力軍，所以本港證券行開戶時，無不打醒十二分精神。究竟人頭戶點運作？睇嘢喇。
利用人頭開戶，無非都係唔想買賣股票畀證監會查到，總之就唔想自己上身。
人頭戶當然有人幕後指揮，但人頭都有高低級之分。高級係有名氣嘅人，即係外表着到身光頸靚，背後可能都係「代客泊車」！低級嘅就係指普通人家、學生哥咁。老行尊笑笑口話「警訊都有做過啦，好似有啲暑期工，唔使點做就有錢收，原來係要借個銀行戶口畀人用！」
近來北水湧港，咁多內地人來港炒股，亦多咗內地人加入呢個「人頭大家庭」。市場人士話，幕後人士可能更Like，因為內地人一日唔落嚟香港，證監要查都幾難。
開咗人頭戶後，有啲人頭會直接將個網上交易密碼畀人。呢行潛規則係，一有乜風吹草動，就會用完即棄。除咗個別人士有唔同收費外，普通人家一般都係按月薪計，一個月收固定金額酬勞。
面對蠱惑招，證券行開戶時都特別提高警覺，制訂多項反人頭戶策略。好似開戶時，遇上待業、或職業以炒股為主、又或望落去唔多對路者，證券行會額外小心。
開戶表格有一項會問資金來源、年收入、資產幾多等，「唔通普通打工仔，年收入過一球（100萬元），又或者買股票金額係資產嘅倍數，都唔特別注意咩？」
若係內地人開戶，佢哋仲講明唔歡迎用內地身份證上的地址作為住址證明，事關內地有關方面係唔會核實個地址；最後，證券行仲會將個名，嚟同經濟犯罪與反洗黑錢資料庫核對一下添。
呔點襯恤衫：呔同恤衫嘅圖案要一大一細：細花圖案恤衫搭大圖案呔；相反，大花圖案恤就要搭條細花圖案呔
襪：襪嘅顏色要襯番條褲，唔係襯對鞋。例如藍褲要着藍襪，唔理對鞋乜色
鞋：黑鞋襯西裝至安全？No喎，係啡鞋至真。呢三隻色嘅鞋，唔會死錯人︰啡、白蘭地色、暗紅偏啡
女士着乜好：唔使驚着得太有女人味。記住，你真正嘅武器係個腦，加埋個Look夠優雅，威力仲大
余絲韻