上位，唔係一定齋靠學歷，有人憑吹水一樣得，係高盛總裁科恩（Gary Cohn）呀。科恩自爆當年就憑個「吹」字入到金融業，依家係高盛第二把交椅，係華爾街精英之中嘅精英，年薪1.7億港元咁啦。
咪以為科恩細個已經好掂，原來佢有閱讀障礙，畀人當傻仔，連老師都話科恩將來做到貨車司機都算好彩。
佢大學畢到業，但乜工乜Interview都冇，就搵份推銷窗框嘅工做住先。有次佢趁去紐約出差，偷時間去商品交易所蒲，仲企正喺Trading Floor門口磨，諗住識番個人搲份工。到收市，科恩打算返歸，突然一個身光頸靚西裝男由Trading Floor衝出嚟，仲一路叫話「遲晒，要趕去機場」。科恩於是追住人話自己都要去機場，Share同一架的士。
西裝男原來喺間經紀行管期權買賣，程車塞咗45分鐘，科恩就猛Sell自己幾想要份金融工，仲拍晒心口話自己乜都識連期權都識。嗰日係星期五，西裝男就叫佢下星期一約面試。
其實，科恩當時連期權係乜都唔知，於是喺周末搏晒命讀熟嗰本《Options as a Strategic Investment》惡補，有讀寫障礙嘅佢，真係足足睇咗4次，結果面試得咗。佢做咗幾年後，就畀高盛挖角。
冇錯，科恩係由吹開始，但之後有立即搏命搵料充實番自己o架！
余絲韻