絲絲講場：領匯捐助導盲犬 好有心
就快公布業績嘅領匯（00823），早排作價大概23億人仔，收購咗個好Hi-Tech嘅北京歐美匯商場。香港商場仲用緊傳統紅外線計算器係出入口計人流，人哋北京歐美匯已經用閉路電視加埋電腦軟件嚟「數人頭」，領匯仲打算將呢套可以掌握商場嘅零售大數據嘅技術帶返香港。
咁套技術又數唔數到「狗仔頭」嘅呢？講緊嘅隨時會喺領匯旗下物業出沒嘅導盲犬。
旗下物業自由出入
領匯捐助咗香港導盲犬協會引入啲導盲犬BB，有4隻拉布拉多BB七月就到香港，佢哋上個月先喺澳洲出世，領匯仲為佢哋搞命名比賽，要英文名。咦，只限領匯員工參加？原來係為咗等啲員工記住，領匯旗下物業係絕對歡迎導盲犬進入。
唔講唔知，導盲犬BB改名原來有規距。為方便日後追查狗狗出生時間同來源地，香港導盲犬協會規定狗狗要跟英文字母順序去命名。今次2隻黃色BB早啲出世，個名會用「F」字頭，黑色嗰２隻會用「G」字頭。
咁一隻叫「Fire」一隻叫「Go」得唔得？係唔得。個名要避免一啲敏感或常用字，以免狗狗同佢主人會錯意。
余絲韻