孖妹S檔案：證券行經理戰績比試
孖妹蒲盡全港大小魚缸，同證券行上下同仁交情非淺，喺打聽股海秘聞嘅同時，都八到原來平時四萬咁口貼心照顧客人嘅分行經理，其實猛人輩出，唔少仲身懷炒股絕學，今次我哋趁機搵咗五位缸湖中人對決，齊齊估吓上半年恒指收幾點？兼搵升跌照賺嘅強勢股！
註：本報將於七月初公布是次決戰結果，哪一位估市最醒，而哪一位推股至勁？到時自有分曉！
荃灣細價股王：博醜股爆升 有秘訣
高：英皇證券荃灣分行經理 高初定（Stephen）
彩兒：投資最重要係緊貼市場大勢，睇嚟你「順勢跟風炒」嘅技術已經爐火純青！
高：市場熱炒「醜股」，由四月份起我靠估中多隻爆升醜股都頻頻食胡，部分股友市後仲留守券行同我齊齊研究醜股到六點。
呢排啲有盈利嘅「正常股」唔識點升，反而一啲冇盈利同數據差、而且長期唔郁嘅醜股就連連爆發，單日成交拍得住以往嘅全年嘅總和，主因係有莊家炒上，想炒就要勇字當頭順勢炒，一破位就入，嚴守止蝕位，實行用少量資金刀仔鋸大樹！高回報即係高風險，呢類股唔啱同佢過人世，隨時供股、合股，可能渣都冇，到時真係冇仇報，另外若股份由仙股變毫子股可能是見頂先兆。
個人心水係勵晶太平洋（00575），佢○六至○七年一度癲升，我會參考往績走勢炒，訂10%止蝕位。一旦升一倍，就沽一半，當零成本「放紙鳶」就唔怕瞓唔着啦！
Kitty：你玩細價股叻，唔知你估市係咪同樣醒？
高：我留意到聯儲局耶倫口風，加上美國經濟數據參差，相信六月八成機會唔加息，所以對後市樂觀，預計上半年可以28,850點收報。
預計恒指上半年收報：28,850點
決戰股：勵晶太平洋（00575）
必殺技：嚴守止蝕，參考往績走勢模式
元朗捉路之王：穩陣派 睇好環保股
鄭：凱基證券元朗分行經理 鄭仲嫺（Candy）
Kitty：港股四月進入大時代，你應該賺唔少？
鄭：我係元朗街坊，同股友朝見口晚見面，連去街市買菜都撞到嘅，就好似鄰居咁熟。不過，早前禾雀亂飛，我同股友各有各忙，有心水都唔得閒入市，睇住心水股升一、兩倍！依家邊敢亂追貨，唔怕接火棒咩！
彩兒：你係保守型長線投資者，近排有乜Must Buy Items？
鄭：我平日會喺港交所披露易做功課，Check中央結算系統持股紀錄了解股權分布，盯實內地國策去向。近年環球聚焦地球暖化問題，密密舉行國際會議推動環保，環保投資趨增，從事水源及清潔能源等相關企業有望長遠受益，龍頭股必先受惠，不過既然是長線投資，基本面都好重要。
Kitty：個市咁跌法，想嚇死人咩！
鄭：顧及市場對深港通嘅憧憬，整體氣氛仍正面，不過市場對美國嘅加息預期有機會對股市造成阻力，預計恒指上半年可以貼近28,500點收。
預計恒指上半年收報：28,500點
決戰股：中資環保股
必殺技：在披露易找資料，翻查中央結算系統持股紀錄了解股權分布
九龍城新鮮人：新人王 國策尋新歡
廖：耀才證券九龍城分行經理 廖淑軒（Natalie）
彩兒：你係經理界新人，但勝在大學財務金融系出身，分析上市公司營運數據「冇難度」！聽聞你對住炒股多過你食飯嘅股友都唔會怯場，唔少魚缸客仲會問你入市或選股策略做參考添！
廖：我係港股好友。內地資金持續流入港股，A股成交不斷創新高，港股成交可維持喺貼近2,000億元，恒指仍有力上，估計上半年收報28,600至28,800點，甚至貼近30,000點。
Kitty：你長期同國策股「拍拖」，最近有乜新歡？
廖：之前用咗投資組合四成資金配合孖展策略，抽到雲南水務（06839）及德基科技（01301）等半新股，都賺到幾餐飯錢。至愛係基建股，個人心水係中國中鐵（00390）。我平時會喺內地財經網，好似東方財富網搵投資靈感，市場預計一五年一帶一路投資金額可達4,000億元人民幣，而中國中鐵係龍頭，勢可分一杯羹，股價已橫行半個月，料未來有望進一步突破。
預計恒指上半年收報：28,600至28,800點
決戰股：中國中鐵（00390）
必殺技：經常瀏覽內地財經網，了解國情及推敲國策去向
大圍師奶殺手：信晒投行 博追落後
石：致富證券大圍分行經理 石泳傑（Victor）
Kitty：我收到線報，你係「大圍師奶殺手」，部分主婦客喺你7年前做銀行證券部已追隨至今！
石：股友叫我做石仔o架，邊個同你講o架？我特別相信投行眼光，鍾意盯實基金愛股，一啲有質素嘅落後股最啱我口味，近期最睇好國壽（02628）！即使國壽投資收益勢受惠A股飆升，但股價跟唔足，平保（02318）已行先幾步，若能消化散戶蟹貨，有望追落後，並挑戰50元樓上水平，目前個人已將投資組合一半資金重錘買入該股嘅股票期貨。
彩兒：你都睇得幾牛喎。
石：我都睇好大市，恒指四月份單月升幅約3,000點，目前已調整近一半，預計資金會重投大價股懷抱，如果資金持續流入港股，成交保持喺1,200億元以上，而A股強勢勢可帶挈港股，恒指上半年可以29,200點收報，破「五窮六絕」魔咒。
預計恒指上半年收報：29,200點
決戰股：國壽（02628）
必殺技：專吼基金愛股，跟風入市
觀塘淡定老手：炒家返工 為求輕鬆
方：訊匯證券觀塘分行經理 方振龍
Kitty：你炒股近40年，九八年入行前仲係職業炒家，點解當年搵夠唔退休？
方：我貪可以同股友傾股經之餘，仲可以「印印腳」輕鬆炒股，平日股友憑我啲「貼士」賺錢後，仲會請我食飯慶功，好開心。
我嘅投資組合一半投資領匯（00823），旨在穩定收息，餘下作中短線投資，另有3項住宅物業。短炒至愛是軍工概念股，軍工A股屢見爆升，而香港上市的相關股份估值較平及較細價，股價易被挾高，好吸引「北水」，其中中國航空工業（00232）更獲長和（00001）主席李嘉誠入股，值得小注博續升，不過如果喺高位回調一成就要走為上着喇！我持有中國航空工業，帳面賺幅逾三成。
彩兒：點解你睇淡大市？
方：由於美國即將議息，美元強打擊美市，港股難置身事外，再者，港股目前只靠內銀、地產等少數股份支撐，上升力量明顯不足。目前市場未有危機感，事關四、五線股仍見狂升，但前景危危乎，預計恒指上半年睇26,850點。
預計恒指上半年收報：26,850點
決戰股：中國航空工業（00232）
必殺技：留意內地官媒口風，股份高位回調一成即閃
Kitty、彩兒
若有料報畀彩兒同Kitty或有嘢問，可電郵money.biz@on.cc