絲絲講場:王冬勝醒你見工四招

滙豐副主席兼行政總裁王冬勝(Peter)尋日同啲大學生分享銀行界嘅前景,順道醒咗四招面試要訣過啲學生。接招!

第一招

要Presentable。出得嚟見人,除咗要執正個樣,Peter話仲要注意一啲細節,例如握手咁,要力度適中,千祈咪左望右望,要同對方有眼神交流。

第二招

要有Idea。應徵者除咗要做好功課,Peter話勇敢講出自己嘅睇法都好重要,如果冇概念冇Idea就真係「A Very Big Problem」。

第三招

要有Mobility。Peter話入銀行業前要問吓自己「Are You Mobile?」(唔係問你係咪手機!)佢話好多香港人習慣咗舒服環境,樣樣要阿媽幫手,未必接受要成日出去外地闖。

第四招

要有Exposure。Peter話香港大學生好醒,不過就缺少國際視野,所以要睇多啲國際新聞,甚至可攞份外國報紙同教授「切磋」時事一番。

余絲韻