絲絲講場：馬斯克辦學似開「生產線」
有現實版「Iron Man」之稱嘅科技界大佬特斯拉（Tesla）創辦人馬斯克，近排唔講電動車、私人火箭呢啲老本行，佢忽然講教育。話說佢唔Like自己五個仔女去讀傳統學校，索性自己搞咗間小學畀自己同埋旗下SpaceX員工啲仔女讀。
馬斯克一年前，開咗間叫Ad Astra嘅學校，呢個係拉丁文，英文即是「to the stars」咁解。呢間學校嘅特色，係全無班級之分，所有細路係一齊學一齊進步，即是好似條「生產線」咁。
馬斯克話要教識啲細路點自己解決問題。點教？佢話，好似教引擎係點運作，一般傳統嘅會先教：嗱，呢個係螺絲批，呢個係士巴拿……不過馬斯克佢哋就會直接抬部引擎出嚟，教啲細路拆開佢，拆時要用到螺絲批士巴拿，啲細路自然就識螺絲批士巴拿用嚟做乜。
唔Like傳統學校
間學校家陣，連埋馬斯克自己5個仔女，全校只得14個學生，都係佢間私人太空發射公司SpaceX啲員工仔女。嚟緊九月學生會加到20個。
話時話，馬斯克點解咁唔Like傳統學校？聽講佢細細個成日畀同學仔「打鑊甘」，有次仲搞到要入醫院。童年陰影呢家嘢，原來Iron Man都有。
余絲韻