香港同新加坡，經常畀人用嚟比較，兩地嘅經濟發展都一樣成熟，教育水平亦差唔多，咁兩地嘅小股東有無唔同呢？呢個問題，真係有人答到，答案係：有，兼且分別好大。
答到呢個問題兼且最有資格答嘅，係置富產業信託（00778）行政總裁趙宇，事關呢隻房託喺港星雙邊上市，為咗要照顧兩地股東，所以每年嘅股東大會（AGM），就一年喺香港搞，另一年喺新加坡搞。最近一次就喺新加坡開，香港股東就只可以喺本港嘅商務中心睇直播。
雖然兩地股東都同樣大部分係公公婆婆，但趙宇話，新加坡嗰邊啲婆婆伯伯非常團結，佢哋會夾錢請一啲退咗休嘅投行人同會計，一齊出席AGM，去幫手問到篤，全程就攞住本年報係咁問係咁問。管理層為免被考起，好多時又都會請埋核數師一齊出席撐住。
由於兩地語言大不同，新加坡當地每講完一句英文，都要現場工作人員翻譯成一句廣東話畀香港股東聽，所以每次AGM都起碼要開兩粒鐘。香港呢邊啲股東似乎就非常唔耐煩，好多時香港股東都係求攞張餅卡就走人。
仲有，唔知係咪新加坡嗰邊啲退休人士零舍清閒，好多時都會等公司點完票，問埋個結果，先捨得離開。趙宇話，有一次點票點咗三粒鐘，啲公公婆婆就留喺酒店三粒鐘咁等。
絲絲諗，香港啲小股東，會唔會係見人哋新加坡股東做足晒功課，所以咁放心呢可。
余絲韻