絲絲講場：利記太子女心如鐵石
LME亞洲年會曲終人散，尋日臨散場前最後一個節目係一班金屬業界做得有聲有色嘅女士聚埋一齊分享，主辦單位仲邀請到利記（00637）行政總裁陳婉珊（Clara）講佢喺傳統嘅金屬男人世界裏突圍而出嘅親身經歷，點捱出頭？就係堅持唔放棄、Keep住想知想學嘅決心。大家聽就呢幾個字，Clara背後20年就有血有汗。
做大家族金屬生意
Clara平時演講不少，但咁貼身公開講番自己故事，就真係好少有。佢話，做金屬嘅家族生意利記喺一九四七年成立，自己係家族第四代，自己生長喺一個極傳統家庭，有幾傳統？依家凡大時大節佢哋要跪低向老人家敬茶。
公司業務又係傳統由男人主導，佢屋企有四兄弟姐妹，佢係大女，尚有1個細佬，兩個妹妺。咁喺傳統家族事業都係傳仔情況下，佢點樣可做到集團CEO呢？
佢喺澳洲同加拿大畢業後，九五年就加入公司，回顧番呢20年生涯，一啲都唔容易。初期乜都要學，仲要落手落腳做。好似喺內地建廠，大家都知，金屬工廠入面溫度超高，佢都冇有怕照入去。初加入公司時，連與同事相處都有難度，客戶同供應商又唔信佢，直接搵佢爸爸傾。
由30夥計捱到200人
佢話，最緊要就係堅持唔放棄，同埋要畀出想知想學嘅決心。直到○六年佢帶住公司上市，公司由最初30人增加到依家200人，啲員工開始對佢改觀。
喺呢個男人主導行業嘅工作世界，Clara原來亦有優勢：就係女士溝通技巧較好，遇上有乜爭拗女人出面會較易處理。而且，有佢在場，啲男士唔會講粗口。咁同啲行家相處呢？佢公餘時會同成班工業家一齊去行山，得佢一位女士，行慢咗，啲Gentlemen都會等埋佢。
余絲韻