記唔記得「千年蟲」？「千年蟲」嘅「表弟」閏秒嚟緊，就係稍縱即逝嘅呢一秒，全球各地交易所如臨大敵，擔心電腦出錯Down機釀股災，唯獨我哋港交所唔怕呢次閏秒股災！
閏秒每隔幾年就出現一次，每次要調整標準時間一秒，以修訂同地球自轉之間嘅小偏差。
今次閏秒調整，會喺美國東部時間六月三十日晚上八點之前加多一秒，咁就撞正美國市後交易，亞洲就啱啱開市，係九七年以來第一次喺活躍交易時段搞啲咁嘅嘢，但今時今日啲程式交易逐秒計，今次有乜差池就大鑊。
交易所點應對？芝加哥商品交易所同洲際交易所就索性將部分電子交易押後開市，而紐交所旗下NYSE Arca、納市同BATS Global就將市後交易提早「收工」，總之避得就避。
亞洲就多數喺個系統度做手腳「溝稀時間」。日本會將閏秒前幾秒略為延長；澳洲同南韓就會「溝稀」閏秒之後嗰幾秒；新加坡就會等閏秒過後，再調整早上時間。交易所各師各法，分析話可能仲危險，驚啲交易指令執行唔到。
倫敦同歐洲到時係休市時段就話唔使點憂，我哋港交所（00388）又點解唔使驚？皆因嗰一秒閏秒，係喺香港時間七月一日朝早八點，當日係回歸假期，遠離正常交易時段，所以冇影響。
余絲韻