都話咗上市公司管理層唔易做，今次輪到太古地產（01972）主席史樂山，佢尋日股東會上畀小股東當面窒，唔係為粒燒賣唔啱食，又唔係為把紀念遮唔「縮骨」，今次係為咗兩隻貓仔，小股東直轟太地趕絕貓仔。
話說小股東李先生，佢公司租咗太古廣場一期Office都成10年，對嗰度附近嘅流浪貓貓照顧有加，佢自己喺嗰度餵貓就餵足7年，佢話以前太古廣場周圍有十幾隻貓，佢自己收養咗兩隻，身邊朋友亦幫手收養同幫啲貓絕育。
到依家，附近只剩低兩隻流浪貓貓，佢已經「拍晒心口」保證保持環境乾淨，但係保安同園丁係都要清走啲貓糧，仲好惡對佢，又阻止佢餵貓。呢位愛貓護貓嘅小股東尋日就喺太地股東會，直接質問管理層「係咪連兩隻貓都容不下？」
小股東呢句，幾咁擲地有聲，絲絲聽到都替主席史樂山頭痕，點答都出事。結果，史樂山話對兩隻貓「No Comment」，不過會搵同事跟進咁話。
都話咗今時今日嘅小股東好有要求，唔再係齋睇間公司賺唔賺錢咁簡單。話時話，難得有位愛貓叔叔肯為嗰兩隻貓咪仔出聲，貓咪貓咪，一定要繼續生生猛猛啊。
余絲韻