成功靠父幹？凡事有例外。好似港交所（00388）董事李君豪位千金，唔使靠老竇，仲極速賺咗一大筆錢，用自己錢遊埠歎世界！
話說李君豪位乖乖女，幾年前喺美國大學畢業後，明明有份好工等住佢，佢都唔吼，老竇李君豪甚至「恐嚇」話要剪咗佢張信用卡，佢亦無理，阿女搞乜？原來阿女自己走去申請創業基金得咗5,000美元，開檔做電子跳舞音樂網，6個月後就成功集資咗40萬美元，再過多6個月後，佢做嗰個跳舞音樂網仲直頭以180萬美元賣咗畀人。
套現所得分番畀其他股東後，阿女自己淨袋一大筆，咁仲唔單止，收購者仲畀多45萬美元阿女去完成埋發展緊嘅音樂網。有錢賺之餘，仲可以完成自己嘅夢想！阿女之後就用自己錢去環遊世界，增廣見聞。
呢個咁美好嘅古仔，李君豪究竟想同絲絲講乜？佢話，好多IT人初期成立公司時都係冇錢，要不斷依靠外來資金支持，先可以壯大公司，但創辦人嘅股權會因為咁而不斷被攤薄，但創辦人其實係公司嘅靈魂，冇咗佢公司就係零。所以，李君豪嘅結論係，佢支持畀「同股不同權」嘅公司上市！原來講呢啲。
余絲韻